20 jaar gelede

MAANDAG 14 AUGUSTUS 2006

– Ofskoon Air Namibia die versekering gegee het dat hy die situasie by lughawens in Brittanje fyn monitor om passasiers na en van Namibië se veiligheid te verseker, sê die Namibiese hoë kommissaris in dié land Namibiërs moet om veiligheidsredes liefs nie soontoe vlieg nie.                 

– Namibië se graanmandjie bult behoorlik ná die mildelike reën wat die afgelope seisoen landwyd uitgesak het: die mielie-oes alleen is 30% groter as verlede jaar s’n en oorskry gemiddelde vir die afgelope vyf jaar met 60%. 

– Nog drie mense het Vrydagaand op die pad tussen Windhoek en Okahandja gesterf en die dodetal op die land se hoofweë in minder as 14 dae met ’n reuse 16-tal opgestoot.   

DINSDAG 15 AUGUSTUS 2006

– “Hier is eenvoudig nie genoeg hande om te help nie. Ons soek mense om ons te help om die brande te blus, anders gaan die hele land afbrand.”                        

– ’n Lid van die weermag is verlede week op ’n uitkenningsparade as een van die verdagtes in die opspraakwekkende moord op twee vroue van Otjiwarongo uitgewys.     

– Namibië het gister sy dringende reiswaarskuwing oor Britse lughawens herroep.                                                        

WOENSDAG 16 AUGUSTUS 2006                     

– Namibië se langverwagte tweede selfoondiens, Powercom, sal voor Desember in bedryf wees.      

– Twee broers het ternouernood aan die dood ontkom in een van drie brande wat in die noordweste van die land woed.  

DONDERDAG 17 AUGUSTUS 2006

– ’n Nuwe strategiese plan waarvolgens grondhervorming oor die volgende 14 jaar teen ’n koste van N$3,7 miljard gaan plaasvind, is in Windhoek vrygestel.         

– Windstorms langs die sentrale kusgebied het gisteroggend ’n tol geëis toe ’n witvistreiler van Walvisbaai, die Kolmanskop, net noord van Vierkantklip tussen Swakopmund en Walvisbaai op die rotse geloop het.                  

– Wilddiewe wat Saterdagnag die veld op vier plekke aan die brand gesteek het om vervolging te bemoeilik, is die oorsaak van ’n brand wes van Okahandja wat al meer as 30 000 hektaar verwoes het.                               

VRYDAG 18 AUGUSTUS 2006

– President Hifikepunye Pohamba herdenk vandag sy 71ste verjaardag, maar van feesvier is daar egter min sprake aangesien hy ’n bedrywige dag voor hom het.                      

– Die opsporingstelsel van die Umfolozi is gevind.

– ’n Moeë, maar baie opgewonde Venantia Otto – Namibië se tweede wenner in die Nokia Face of Africa-kompetisie – het vroeër die week ’n paar minute afgeknyp om gou met Republikein te gesels nadat sy Sondagaand dié gesogte titel ingepalm het.