20 jaar gelede

MAANDAG 3 JULIE 2006

– Nog hofstukke in die diereryk se verhale oor Tabar se reise het langs die sentrale kusgebied afgespeel.             

– Vir die eerste keer sedert die Namibiese regering in opdrag van die Swapo-kongres begin het met die onteiening van kommersiële plase vir grondhervorming, gaan die plaas van ’n “swart” eienaar nou ook onder die swaard beland. 

– Dit was moord toe ’n struikrower die naweek op die Trans-Caprivi-hoofweg toegeslaan het.  

DINSDAG 4 JULIE 2006

– Die beplande vestiging van ’n Chinese lokomotief monteeraanleg op Usakos en TransNamib se beplande aankoop van nog 17 van dié lokomotiewe vir sowat N$260 miljoen, het ’n ernstige terugslag gekry nadat die vier prototipes wat reeds in die land is, onveilig vir gebruik verklaar is.                  

– Die goewerneur van die ||Kharasstreek, me. Katrina Hanse, het andermaal die gemeenskap van Mariental soos drake laat vuur spoeg nog voor die uitslag van ’n verkiesing vir skoolkomiteelede openbaar gemaak is.      

– ’n Egpaar van Port Elizabeth, Jacques en Mia Vermeulen, kon Vrydag hul toer taamlik sorgvry deur Namibië voortsit nadat hulle in die nag in Swakopmund se Vineta-buurt deur diewe oorval en beroof is.                                                           

WOENSDAG 5 JULIE 2006

– Dr. Leake Hangala is as senior visepresident van die Noorweegse telekommunikasiemaatskappy, Telecom Management Partner AS (TMP) aangestel.                         

– Een van Windhoek se bekendste handelaars in gebruikte voertuie, mnr. Frans Smith (55), is gisteroggend tuis aan ’n hartaanval dood.     

– Twaalf ontslane werknemers is gisteroggend in die jongste verwikkeling in die herstruktureringsdebakel op Aussenkehr in hegtenis geneem.

DONDERDAG 6 JULIE 2006

– Die ingryping van die Eerste Minister, mnr. Nahas Angula, het verseker dat die soveelste hofsaak oor grondhervorming teen die Minister van Grond en Hervestiging, mnr. Jerry Ekandjo, voorlopig gestol het.     

– Die Ministerie van Gesondheid en Maatskaplike Dienste is bekommerd oor straatpraatjies dat dit nie vir iemand nodig is om op 18 Julie vir ’n tweede dosis van polioslukstof aan te tree indien die eerste dosis tussen 21 en 23 Junie ontvang was nie.                 

– Die Arbeidshof op Keetmanshoop het Dinsdag ’n vorige verstekvonnis van dieselfde hof wat TransNamib verplig het om ’n vermeende kuberspioen in sy diens terug te neem, nietig verklaar.                               

VRYDAG 7 JULIE 2006

– ’n Spelery met ’n rewolwer het Woensdag tot die dood gelei van ’n seun wat waarskynlik vanjaar sy skoolloopbaan sou voltooi het.                     

– Die stryd onder Namibiërs om te voorspel wie Sondag se eindstryd van die Wereldbekertoernooi gaan wen, was gister met Republikein se inbelprogram ’n aanduiding van hoe onseker sokkerliefhebbers oor die skouspel is. 

– ’n Lening van N$120 miljoen wat deur die Regering gewaarborg gaan word, is die reddingsgordel om nog ’n staatsmaatskappy, Namibia Wildlife Resorts, van ondergang te red.