20 jaar gelede

MAANDAG 3 APRIL 2006

– Die moontlikheid dat Namibië oor ryk oliereserwes beskik, het opnuut in die kalklig beland nadat ’n olie- en gaseksplorasiekontrak van N$518,3 miljoen met ’n private Russiese maatskappy, Sintezneftegaz, gesluit is.

– Die speurhoof van die polisie en een van die sleutelfigure in die geregtelike ondersoek na die dood van die omstrede mnr. Lazarus Kandara, hoofinsp. Oscar Sheehama, het Vrydag uit die mag getree.

– Mesaanvalle waarin drie mans gesterf het, het die naweek die misdaadtoneel in Windhoek oorheers.

                                                           

DINSDAG 4 APRIL 2006

– Korrupsie skrik nie net buitelandse beleggers af nie, dit bedreig ook nasionale eenheid.     

– ’n Dringende ondersoek is deur die hoof uitvoerende beampte van die Windhoek-munisipaliteit gelas ter bevestiging of weerlegging van beweringe wat gelei het tot die summiere skorsing van die hoof van die munisipale verkeersdiens, mnr. Elifas !Owos-ôab.     

– Die karakoelbedryf het ná 25 jaar weens sy regmatige plek as een van die sleutelbedrywe op die Namibiese landbougebied herwin en hou veral vir opkomende en kommunale boere groot ontwikkelingsmoontlikhede in.

– Veediefstal in die Aranos-omgewing neem kommerwekkende afmetings aan terwyl slegs ’n geringe persentasie van die sake wat by die plaaslike polisiestasie aanhangig gemaak word, aandag geniet.

WOENSDAG 5 APRIL 2006

– Alle oë is vanoggend gerig op die landdroshof op Mariental waar die vier verdagtes in die opspraakwekkende Kareeboomkolk-moordsaak, ná maande van afwagting sal hoor watter pad die Aanklaer-Generaal (AG) voornemens is om met die saak te stap.            

– ’n Bruikbare handleiding waarin omvattende inligting van verskeie sektore van die Namibiese samelewing gegee word, is pas bekend gestel. 

              

DONDERDAG 6 APRIL 2006

– Angelina Jolie is in Namibië vir die geboorte van haar eersteling.                                               

– Die selferkende moordenaar van agt mense, sy broer en handlanger, die vermeende opdraggewer en die man wat glo gehelp het om die buit agterna te versteek, sal op 18 Mei hulle eerste verskyning in die Hoërhof in Windhoek maak.   

– Die polisie op Gobabis het begin toeslaan nadat arbeidsonrus op plase in die distrik opnuut begin opvlam het met betogings, politieke aanhitsing, afpersing en selfs brandstigting.

VRYDAG 7 APRIL 2006

– Die effek van die tekort aan Avgas-lugvaartbrandstof in Namibië het reeds begin om wyer in die land se ekonomie uit te kring.             

– ’n Vermeende profeet voorspel ’n katastrofie in Namibië wat nie net die Marientalvloed na ’n vulletjie sal laat lyk nie, maar selfs die tsoenami in die Indiese Oseaan, orkaan Katrina en ander onlangse natuurrampe gaan verdwerg.