Wetgewing wurg burgerlike sektor

“Die tyd het aangebreek om burgerlik ongehoorsaam te wees,” sê Joris Komen, die stigter van die niewinsgewende organisasie Netday Namibia. Dit na aanleiding van die Bank of Namibië (BoN) se Sentrum vir Finansiële Intelligensie (FIC) wat steeds daarop aandring dat alle niewinsgewende organisasies in Namibië teen 29 September geregistreer moet wees en aan streng verklaringsmaatreëls in verband met hul geldsake moet voldoen. Dit sodat die FIC glo kan vasstel of ’n organisasie ’n risiko loop om terrorismebedrywighede te finansier of vir geldwassery gebruik te word. By ’n vergadering wat Vrydag by die Hilton Hotel in die hoofstad gehou is het Kristian Hamutenya, die FIC se adjunkdirekteur van nakoming, gesê niks kan nou aan die nuwe wetgewing verander word nie. “Ongelukkig nie nou nie,” was sy antwoord op vrae oor die aanskuif van die sperdatum of versagting van die vereistes.Hy sê in terme van registrasie en nakoming is die fokus veral op kerke, geloofsgebaseerde organisasies en welsynsorganisasies wat onder meer betrokke is by behuising, gesondheid, welsynsdienste en onderwys. Organisasies van dié aard moet die FIC dringend kontak, sê Hamutenya. Behalwe vir die bogenoemde moet alle niewinsgewende organisasies die Wysigingswet op Finansiële Intelligensie no. 6 van 2023 gehoorsaam. Gevolglik het verteenwoordigers van onder andere die Namibiese Hartstigting (NHF), die Orange Babies-stigting, St. Paul’s Kollege, Kanaal 7, die Side by Side-sentrum, die Namibia Life Change Centres Foundation (NLCCF), die Afrika Metodiste Episkopale (AME)-kerk, Youth with a Mission, die Rural People&#039;s Institute for Social Empowerment (Rise), die Instituut vir Openbare Beleidsnavorsing (IPPR), die Hans Seidel-stigting, die Huis Maerua-kinderhuis en die Namibiese Nasionale Onderwysersunie (Nantu) sowel as talle jeugorganisasies almal die vergadering bygewoon. Die nasionale welsynsraad het 521 geregistreerde organisasies onder hom, en 3 580 niewinsgewende organisasies het tans aktiewe bankrekeninge in Namibië. “Die vyand teiken die kerk deur die gebruik van regulerende magte, verwarring en tegniese aspekte,” het een kerkamptenaar gesê. Nog ’n verteenwoordiger het gevra: “Hoekom moet ons gestraf word en ons tyd gemors word? Skenkers verloor reeds belangstelling omdat ons dit vir hulle moeilik maak.” Nog een het gesê die regering se jongste wetgewing het ’n bestraffende wet vir burgerlike organisasies geskep. “Julle maak misdadigers van gemeenskapswerkers,” het hulle gesê. Volgens die nuwe wetgewing kan nie-nakoming daartoe lei dat die FIC ’n boete van tot N$10 miljoen oplê, of die howe nader vir tronkstraf van tot tien jaar vir die “skuldiges” – met boetes van N$50 000 vir elke dag wat die vereistes ná skuldigbevinding nie nagekom word nie.Volgens ’n verteenwoordiger van die Raad van Kerke in Namibië (CCN) het hulle vrystelling gevra en is ingelig hulle moet aan die verseistes voldoen of die nagevolge in die gesig staar. Die Kankervereniging van Namibië (CAN) sê hulle kan nie skenkers dwing om oudit-inligting te deel of polisieklaring te verskaf nie. “Hulle stap liewer weg,” sê die verteenwoordiger. Sekere ander niewinsgewende organisasies is glo reeds in kennis gestel dat hulle nie aan die vereistes voldoen nie. Hamutenya het verduidelik die streng maatreëls moet toegepas word omdat die Verenigde Nasies (VN) se Finansiële Aksietaakmag (FATF) daarop aandring. Daarsonder sal Namibië op ’n internasionale gryslys geplaas word waarop Suid-Afrika reeds is. Die doel van die wysiging is glo om burgerlike organisasies te reguleer, en hy het gesê hy verstaan hoekom die sektor geteiken voel. Nogtans gee die wetgewing die FIC die mandaat om te help waghond speel, siende dat die nasionale raamwerk onvoldoende is, sê hy.Eben de Klerk van die Namibiese Vereniging vir Ekonomiese Beleidsnavorsing (EPRA) sê die regering se benadering sal burgerlike organisasies in Namibië beslis verminder. EPRA sal nie hul skenkers ontbloot nie, sê hy en voeg by dat EPRA aan die 35 demokratiese lidlande van die FATF sal skryf oor die gevolge van hul vereistes. Hy het ook gesê hulle sal prokureurs betrek om die grondwetlikheid van die nuwe wetgewing uit te daag.- augetto@republikein.com.na

Wetgewing wurg burgerlike sektor

Kommentaar

Republikein 2026-02-03

Meld asseblief aan om kommentaar te lewer

Wetgewing wurg burgerlike sektor

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.