Vullishoop toe vir RCC Kamp se mense

’n Donker wolk hang oor inwoners van Okahandja se nedersettings, spesifiek die huisgesinne in die RCC Kamp. Dit nadat hulle middel van Februarie met uitsettingsbriewe verras is. Prokureursbriewe wat al in 2022 opgetrek is, is op 15 Februarie afgelewer om inwoners in kennis te stel dat hulle 30 dae het om George Gariseb se eiendom te verlaat. Die RCC het die grond ter sprake al in 2011 aan ’n Gariseb verkoop. Dit volgens inligting op rekord wat die uitvoerende hoof van die dorpsraad, Alfonso Tjitombo, voorheen met die koerant gedeel het.Die dorpsraad se notules van Junie 2011 dui dat Gariseb nege erwe van altesaam ongeveer 6 000 vierkante meter verkry het.Tjitombo het Donderdag gesê die munisipaliteit se pogings was tot dusver onsuksesvol om Gariseb in die hande te kry om die inwoners se dilemma te bespreek. Volgens Tjitombo het die munisipaliteit reeds 20 erwe in Ekunde no. 4 vir RCC-inwoners opsy gesit, alhoewel Tjitombo erken die gebied is nog nie gediens nie. Ekunde no. 4 is ook waar die dorp se stortingsterrein geleë is, wat Tjitombo sê moet nog verskuif word. Nietemin is die Okahandja-munisipaliteit bereid om die inwoners van die RCC Kamp te help om hul eiendom daarheen te skuif, en om betonblaaie te gooi waarop die inwoners hul huise kan oprig, sê die munisipale hoof.Die inwoners het reeds in Desember verlede jaar hul teenstand teen dié verskuiwing bekend gemaak. Hulle het ook in November geweier om ontvangs van die uitsettingsbriewe te neem. Else Kehinana woon al sedert 1995 in een van die huise wat die staatsbeheerde Paaiekontrakteursmaatskappy (RCC) oorspronklik gebou het. “Hulle sê iemand het die plek kamma vir N$100 000 gekoop, maar wat van ons wat al jare hier bly? Wat van ons kinders wat hier gebore is,” wou sy geweet het.Tjitombo het Donderdag gesê die munisipaliteit probeer om vir Gariseb in die hande kry om onder andere die moontlikheid te bespreek dat hy dalk ’n ander stuk grond in ruil vir die RCC Kamp sal oorweeg. Hy sê die munisipaliteit wag ook op terugvoering vanaf die lynministerie nadat ’n appèlspan glo die nedersetting besoek het en ’n verslag oor die situasie moet indien. Die inwoners van Okahandja se nedersetting het voorheen ook by die minister van stedelike en landelike ontwikkeling, Erastus Uutoni, om hulp gaan aanklop. ’n Groep het in Julie 2022 met ’n gehuurde bus Windhoek toe gereis en tot by die ministerie se hoofkantoor geloop, en ’n klagskrif oorhandig. Daar het dadels van die protesaksie gekom.In Oktober verlede jaar het hulle ’n optog na die eerste minister se kantoor gehou, ook met geen positiewe uitkoms nie.Een van die aktiviste wat die inwoners ondersteun, is Sethy Gariseb en volgens hom beplan hulle om op 16 Maart weer hul pleidooie na die hoofstad te bring. – augetto@republikein.com.na

Vullishoop toe vir RCC Kamp se mense

Kommentaar

Republikein 2026-05-05

Meld asseblief aan om kommentaar te lewer

Vullishoop toe vir RCC Kamp se mense

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.