Uitwissing van armoede onder die vergrootglas

Wêrelddag vir die Uitwissing van Armoede wat in 1987 deur die Verenigde Nasies (VN) ingestel is, is Maandag in Windhoek gevier.Die Basiese Inkomstetoelaag (BIG)-koalisie het die geleentheid gebruik om by die D.I.C. Havana Kindergarten besoek af te lê. Volgens die koalisie se woordvoerder, me. Rinaani Musutua, is armoede ŉ reuseprobleem in Namibië, wat veral kinders negatief beïnvloed.“Wêrelddag vir die Uitwissing van Armoede is ŉ dag wat ingestel is om die kwessie van armoede uit te lig en sodat ons diegene wat ons ons heersers noem, of ons verkose leiers, daaraan kan herinner om armoede ernstig op te neem,” sê sy. “Kinders word meestal deur armoede geraak,” sê sy oor die rede hoekom hulle die kleuterskool besoek het. Dit is ook om bewustheid onder die gemeenskap te skep vir ŉ oplossing. Die oplossing is ŉ universele basiese inkomstetoelaag,” sê sy.Die Namibiese Belastingkonsortium (NamTax), ’n kommissie wat deur die regering aangestel is, het die voorstel vir ’n basiese inkomstetoelaag vir Namibië in 2002 gemaak. Die konsortium is gevra om die huidige belastingstelsel in Namibië te hersien. Die voorstel vir ’n basiese inkomstetoelaag is deel van hul aanbevelings om inkomste in die land te herverdeel.Die kenners se navorsing het ná ses maande gewys te veel Namibiërs bestee maandeliks té min, wat die belastingbetalerbasis beperk.Politici verwerp sedert die ontstaan van die idee ’n universele toelaag aangesien dit Namibiërs sal lui maak en nadelig vir die ekonomie sal wees. Kerkorganisasie het toe die stryd opgeneem en saam met burgerlike organisasies en ander belanghebbers die koalisie gestig, wat steeds ’n beroep doen op ŉ niediskriminerend toelaag om armoede te bekamp. Die regering het onlangs aangekondig dat begunsdigdes van die Voedselbank nou eerder kontant sal ontvang. Hulle beskryf dit as ’n aangepaste inkomstetoelaag wat arm stedelike inwoners sal teiken.BIG stel voor elke landsburger tussen die ouderdomme van 18 en 65 ontvang ’n universele toelaag van N$500 per maand, per persoon.Musutua glo die regering is in ’n posisie om BIG toe te pas. “Namibië is ŉ ryk land en dit kan werk as die hulpbronne reg bestuur word. Namibië gaan ook gebuk onder korrupsie, en daardie geld kon gebruik word om armoede uit te wis,” dring sy aan. “Ons glo die land het beslis genoeg geld, maar dit word vermors en net deur ŉ paar landsburgers geniet. Geen regverdige verdeling van hulpbronne bestaan nie,” sê sy. Vrae hieroor, en oor Wêrelddag vir die Uitwissing van Armoede in die algemeen, is Maandag aan die ministerie in die presidensie verantwoordelik vir geslagsgelykheid, armoede-uitwissing en maatskaplike welsyn gestuur.Die presidensie het gister in &#039;n verklaring uitgebrei op wat die regering onder leierskap van pres. Hage Geingob sedert 2015 gedoen het om armoede te verlig, soos om ouderdomspensioen van N$600 per maand tot die N$1 200 te vermeerder wat tans aan sowat 180 000 mense bo die ouderdom van 60 jaar betaal word.Volgens die presidensie moet die benadering tot armoede-uitwissing egter multi-dissiplinêr van aard wees vanweë die kompleksheid van die probleem.– augetto@republikein.com.na

Uitwissing van armoede onder die vergrootglas

Kommentaar

Meld asseblief aan om kommentaar te lewer

Uitwissing van armoede onder die vergrootglas

Kommentaar

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.