‘Osire-kinders gaan honger skool toe’

Vir sommige inwoners van die Osire-vlugtelingskamp het dit toenemend ’n kwessie van oorlewing geword om kos op die tafel te sit.

Vlugtelinge beweer die mieliemeel wat onlangs aan huishoudings uitgedeel is, het reeds verval met gesinne wat nie juis ’n keuse het as om dit te verbruik nie.

Republikein het Woensdag die nedersetting langs die C30-pad tussen Otjiwarongo en Gobabis besoek waar inwoners hul kommer oor voedseltekorte, die gehalte daarvan en die tydsberekening van die uitdeel van voedsel geopper het.

’n Bron uit die kantoor van die kommissaris vir vlugtelinge het gesê die regering het 700 sakke mieliemeel van 50 kg elk – altesaam sowat 35 ton – aan die nedersetting voorsien. Die mieliemeel is van die Divundu-gevangenis verkry.

’n Burundiese vlugteling, Pierre Niyonkuru, wat met Republikein gepraat het, het egter beweer dat die mieliemeel te naby aan sy vervaldatum van 6 September uitgedeel is.

“Almal het vervalde kos in hul huise,” het Niyonkuru gesê.

Hy het beweer dat huishoudings hoeveelhede ontvang het wat hulle nie redelikerwys voor die vervaldatum kon verbruik nie, wat gesinne voor ’n moeilike keuse laat: Eet die kos of bly daarsonder.

“Ons het nie ’n keuse nie. Almal moet dit eet,” het hy gesê.

Die bewerings vorm deel van ’n wyer reeks kwessies wat die gemeenskap van  die vlugtelingskamp in ’n memorandum vervat het wat vandeesmaand aan die Regshulpsentrum (LAC) voorgelê is.

Die memorandum beweer dat voedseluitdelings onreëlmatig geword het en dat voorrade soms naby aan hul vervaldatums voorsien word. 

Die gemeenskap voer aan dat voedseltekorte vererger het sedert veranderinge aan die humanitêre bystandstelsel en die regering groter verantwoordelikheid vir dienste by die nedersetting oorgeneem het.

Hierdie kwessies kom teen die agtergrond van jare se gedokumenteerde voedselonsekerheid by Osire.

In 2022 het die Verenigde Nasies se Hoë Kommissaris vir Vlugtelinge (UNHCR) berig dat befondsingsbesnoeiings en stygende voedselpryse reeds vlugtelinge laat sukkel het om voedselvoorrade deur die maand te laat hou. Die agentskap het gesê sy begroting vir ’n jaar se kos het weens inflasie net agt maande gehou, terwyl ondersteuning vir bestaansmiddele by Osire ook geraak is.

’n Gesamentlike evaluering van die UNHCR en Wêreldvoedselprogram (WFP) wat in 2023 gepubliseer is, het ’n selfs donkerder prentjie geskets. Dit het bevind dat nege uit tien vlugtelinghuishoudings nie in staat was om aan hul bestaansbehoeftes te voldoen nie, terwyl die helfte van diegene wat ondervra is, nie aan hul basiese voedselbehoeftes kon voldoen nie.

Maandelikse voedselrantsoene het dikwels tussen 14 en 21 dae gehou, met onreëlmatige of vertraagde uitdelings wat aan beperkings van befondsing gekoppel is.

Die humanitêre reaksie het later na kontantgebaseerde bystand verskuif. In 2025 het die UNHCR en die regering kontantbystand vir duisende vlugtelinge en asielsoekers by Osire ingestel. Die UNHCR het gesê die program het slegs 40% van die vereiste hulpbronne gehad.

Die UNHCR het nie heeltemal uit die land onttrek nie en werk steeds saam met die regering aan vlugtelingbeskerming en bystand. 

Die memorandum van die gemeenskap beweer verder dat kinders honger skool toe gaan en dat voedseltekorte huishoudelike welstand regoor die nedersetting beïnvloed.

Die bewerings kom ook op ’n tyd wanneer vlugtelinge beperkte geleenthede het om inkomste te verdien en hul voedselonsekerheid te verbeter deur formele werk of volhoubare bestaansmiddele.

Vrae is Maandag aan die ministerie van binnelandse sake, immigrasie, veiligheid en sekuriteit gestuur oor die uitdeel van mieliemeel, insluitend wanneer die 700 sakke afgelewer is, hul vervaldatums, waarom die mieliemeel van die Divundu-gevangenis verkry is en watter maatreëls in plek is om te verseker dat vlugtelinge veilige en voldoende kos ontvang. Geen reaksie is teen druktyd ontvang nie.

– [email protected]