'Ons kinders is nie meer veilig nie'

Jemima Beukes - Me. Rita Seibes, die ma van die sesjarige seun van Karibib wat wreed vermoor en vermink is, het Saterdag moeilik staande gebly toe sy haar seuntjie tydens sy begrafnis op die dorp moes groet. Mnr. Siegried Kheib, 'n voormalige polisiebeampte en gemeenskapsaktivis, het 'n pleidooi aan die gemeenskap gerig om hul stilte te verbreek en te praat as hulle enigiets gesien of gehoor het of weet van enigiemand wat Adreano Oswyn onderweg na sy huis weggelok het.

"Waar is die polisie in hierdie saak?" het die parlementslid, me. Elma Dienda, en me. Rosa Namises, 'n voormalige parlementslid en aktivis vir vroue- en kinderregte, gevra.

"Ja, die regering het ons kinders gefaal, maar ouers moet aanspreeklik gehou word. Ons vertrou ons kinders blindelings aan mense toe sonder om op te volg of hulle veilig is. Die kind (Oswyn) se oupa het hom na bewering halfpad huis toe geneem. Hoe op aarde neem jy 'n sesjarige kind net halfpad? Jy vat hom huis toe en maak seker hy is veilig. Ons leef in 'n siek samelewing, ons mense het siek geword," het Dienda gesê.

Sy het ook die polisie se beweerde versuim om die publiek in te lig oor die ondersoeke wat in hierdie tipe misdade gedoen word, bevraagteken.

Oswyn se grudood volg op die verdwyning van die driejarige Spencer Mandela Nakale in Desember 2021, sowel as die negejarige Avihe Cheryl Ujaha se verminkte liggaam wat in 2018 naby 'n rivierbed tussen Katutura en Khomasdal ontdek is.

Namises en Dienda glo daar is 'n donker geheim agter dié sterftes en verdwynings en dat die polisie nie genoeg doen om die sake te ondersoek nie.

Namises het 'n beroep op die regering gedoen om veiligheidspersoneel vir kinders aan te stel wat speelgronde en woonbuurte monitor en seker maak kinders is teen 'n sekere tyd nie meer buite op straat nie.

"Duidelik is iets baie dieper hier aan die gang - waarom word hulle in stukke opgesny of gekap? Weet ons of daar organe weg is? Dié antwoorde word nie aan die gemeenskap verskaf nie. Iets skort met hoe ernstig ons is oor ons kinders se veiligheid. Ek kry ons kinders elke dag op die strate en straathoeke, jong seuns wat goed voor winkels verkoop. Is hulle veilig teen 'n man wat hulle vir iets wil werf of iets aan hulle wil smous? Word ondersoeke deur die polisie gedoen en hoe doeltreffend is die forensiese departement?," het Namises gevra.

Sy het die wens uitgespreek dat die regering wetgewing sal inbring en toepas wat voorsiening maak dat ouers wie se kinders in onveilige omstandighede verkeer of wat in die strate ronddwaal, gestraf kan word.

Dié wet moet ook ouers teiken wat hulle kinders bewustelik nie by skole inskryf nie en hulle toelaat om te werk terwyl hulle minderjarig is.

"Ons het nie doeltreffende beskermende maatreëls in plek om ons kinders veilig te hou nie. Ons het ons kinders gefaal. Klein kinders staan snags op straat en ek het nie die gesag om hulle weg te vat nie. Dit is waar 'straatbewaarders' kan inkom, omdat sommige kinders alleen by huise gelaat word," sê Namises.

Intussen het kommissaris Nikolaus K. Kupembona, die Erongostreek se polisiebevelvoeder, gesê die polisie is besig om die saak dringend te ondersoek. Hy het ook 'n beroep op die gemeenskap gedoen om die polisie te nader as hulle enigiets weet of gesien het.

"Die ondersoek duur voort, maar niemand is nog in hegtenis geneem nie. Ons het meer as tien mense vir ondervraging ingebring en sommige van hulle was familielede," het hy bevestig.

Me. Doreen Sioka, die minister van geslagsgelykheid, armoede-uitwissing en kinderwelsyn, wat haar nog nie oor Oswyn se dood uitgespreek het nie, kon nie vir kommentaar bereik word nie. - [email protected]