Om weer te kan hoop

Om ‘n woestyn oor te steek, verg deursettingsvermoë, moed en durfkrag. Vir baie kwesbare tieners met ‘n dikwels uiters moeilike agtergrond, is die woestyn ‘n metafoor van hul lang, moeilike reis op die pad na selfgenesing en om bo hul omstandighede uit te styg. ‘n Groep fietsryers van onder meer NG Kerk Windhoek-Oos en Eros, pak daarom in Desember die moordende Desert Dash om geld in te samel vir ‘n liefdadigheidsorganisasie in Namibië wie se unieke doel dit is om gebroke tieners na innerlike genesing te lei. Wilderness Therapy Namibia (WTN) bied aan graad 10- en 11-leerlinge van skole gebaseer in Windhoek en Rehoboth die geleentheid om deur ‘n unieke kombinasie van die natuur en terapie om na binne te kyk en hul stories van hul lewens oor te skryf.Met Ride2Restore wil die ryers die Namib aanpak en oorwin deur met elke kilometer hoop vir kwesbare jong mense in die land los te trap en geld insamel om te verseker dat meer tieners voordeel uit WTN kan trek. Die organisasie se uitgangspunt is dat elke jong mens verdien om te weet dat hy of sy waarde het en gehoor mag word, ongeag uit watter moeilike omstandighede jy kom. Verandering gebeur juis wanneer ‘n jong mens gesien, gehoor en die ruimte gegun word om te groei, ‘n ruimte wat by WTN geskep word in die oorvloedige stilte van die natuur, deur die begeleiding van ervare mentors en met die waarheid van God se liefde.Sedert 2008 word die jongmense uit die stad of dorp gehaal en in Namibië se ongerepte natuur geplaas waar hul tydens weeklange staptoge tyd het om te oordink en weer met God op ‘n persoonlike vlak verbind kan word. Die staptogte van agt dae is allermins maklik, maar lewensveranderend. Na afloop van die staptogte is die jong mense deel van ‘n een-tot-een mentorskapprogram vir ‘n jaar waartydens hulle weer hul identiteit, hoop en rigting herontdek. Die geloofsgebaseerde terapie is holisties en persoonlik en geensins ‘n geval van “ons red jou” nie, maar eerder “ons stap saam met jou”.Tydens die ingrypings- of eerste fase word deelnemers uit hul daaglikse omgewing gehaal en vir tien dae geplaas in ‘n neutrale, uitdagende en ondersteunende omgewing. Dit sluit in ‘n staptog deur onder meer die Naukluft-berge of die Visrivier-canyon. Elkeen voltooi die staptog met unieke uitdagings daagliks met hul rugsak en voorrade vir die agt dae. Die unieke omgewing en die natuur verskaf verskaf ‘n neutral omgewing waarin die deelnemers uitgedaag word met introspeksie, selfontdekking en die besef van selfwaarde. Tydens die eerste vier dae word die stappers ook uitgedaag om hul optrede, gedagtes, opvattings en meer te ontleed en op dag vyf word hulle aangemoedig om die ‘oud’agterlaat en die ‘nuut’te omarm. Na die staptog volg ‘n mentorskapprogram om deelnemers weer in die samelewing te integreer en help mentors hulle om by hul ware en nuwe self te bly in hul bestaande huislike en sosiale omgewing en omstandighede. Vir die volgende 12 tot 18 maande ontmoet ‘n groep deelnemers en ‘n mentor mekaar elke week om daaglikse uitdagings en problem te bespreek. Emosionele ondersteuning van ‘n mentor versterk emosionele groei en veerkragtigheid en bied aan die kwesbare deelnemers ‘n veilige ruimte waar hulle voel hulle word ondersteun en gehoor, ‘n sterk teenvoeter vir gevoelens van isolasie of stress. Die verhouding tussen deelnemer en mentor fokus op luister, empatie en konstruktiewe terugvoer, met die jong mense wat so waardevolle hanteringsvaardighede aanleer en aangemoedig word om hul emosies openlik uit te druk. Die gestruktureerde aard van die mentorskapprogram skep by deelnemers ‘n gevoel van konsekwentheid en betroubaarheid en versterk sodoende ‘n gevoel van verantwoordbaarheid en behoort. Deur vertroue te bou, help mentors die deelnemers om selfvertroue en emosionele intelligensie te ontwikkel wat hulle beter in staat stel om uitdagings te oorkom en hul doelwitte na te streef. Die program loop in September ten einde met ‘n spesiale gradeplegtigheid waartydens deelnemers ook ‘n sertifikaat vir hul deelname aan WTN-geleenthede ontvang. As jy aan ‘n kwesbare jong mens met die hulp van WTN weer hoop en ‘n sinvolle toekoms wil gee, ondersteun Ride2Restore se Desert Dash-doelwit om geld in te samel om dit vir meer tieners moontlik te maak. Gaan loer op hul Facebookblad of op hul webtuiste by wtnamibia.org vir hul back-a-buddy-veldtog of stuur ‘n e-pos aan info@wtnamibia.org.Kliek hier: https://q.my.na/ZSC3Ds (Ds. Eddie Turner van Windhoek-Oos gesels oor Ride2Restore).

Om weer te kan hoop

Kommentaar

Republikein 2025-10-15

Meld asseblief aan om kommentaar te lewer

Om weer te kan hoop

Kommentaar

Republikein 2025-10-15

Meld asseblief aan om kommentaar te lewer

MELD AAN

Advertensie