Miljarde nodig vir aanvraag na grond

Stad Windhoek (CoW) benodig na raming N$7,8 miljard om grond te diens in reaksie op die vinnige toename in stedelike groei. Die hoofstad se burgemeester, Ndeshihafela Larandja, het tydens haar intreetoespraak gesê Windhoek se bevolking sal na verwagting vanjaar 500 000 inwoners bereik. Die vraag na gedienste grond het dus ’n kritieke vlak bereik, veral in informele nedersettings en nuwe residensiële gebiede. “CoW het 52 000 bykomende huishoudings tussen 2011 en 2025 bygekry, wat 165 000 nuwe inwoners beteken, en almal het behuising en munisipale dienste nodig,” het Larandja verduidelik. Met stedelike groei wat die ontwikkeling van infrastruktuur verbysteek, woon 40% van Windhoek se inwoners tans in 130 informele nedersettings en dikwels in swak lewensomstandighede. Om dié krisis te takel, het die hoofstad hom daartoe verbind om 12 000 gedienste erwe teen 2027 teen ’n beraamde koste van N$2,7 miljard te lewer. Larandja het die dringendheid van samewerking met rolspelers beklemtoon en ’n beroep op die private sektor, regeringsagentskappe en ontwikkelingsvennote gedoen om hul pogings in lyn met mekaar te bring om by te dra tot stedelike uitbreiding.“Dis nie net ’n munisipale verantwoordelikheid nie, maar ’n gesamentlike poging,” het sy gesê. Die hoofstad se stedelike struktuurplan wat onlangs bekend gestel is, poog om 'n strategiese raamwerk vir die bestuur van groei te verskaf, sowel as om dienslewering te verbeter en beleggings vir behuising en infrastruktuur te lok. Terwyl die uitdaging vir finansiering ’n baie steil bult is, het Larandja beklemtoon “Windhoek bly oop vir besigheid”. Sy het ’n beroep op vennote gedoen om in volhoubare stedelike ontwikkeling te belê.Soos die hoofstad voortdurend uitbrei, het Larandja gemaan die verkryging van die nodige hulpbronne is van kritieke belang om te verseker alle inwoners het toegang tot ordentlike behuising, water, sanitasie en paaie.– republikein@republiken.com.na

Miljarde nodig vir aanvraag na grond

Kommentaar

Republikein 2026-02-04

Meld asseblief aan om kommentaar te lewer

Miljarde nodig vir aanvraag na grond

Kommentaar

Republikein 2026-02-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.