Mense, diere aas vir kos by Opuwo-vullisterrein

Enzo Amuele op Opuwo – Honde, bokke en mense wat daagliks vir kos baklei blyk ’n alledaagse verskynsel by Opuwo se stortingsterrein te wees.Owerhede het jare lank tevergeefs gesukkel om inwoners van die vullisterrein weg te hou – ten spyte van die ernstige gesondheidsrisiko’s verbonde aan die inname van voedsel waarvoor op die terrein geaas word.Die dorp se onomheinde stortingsterrein is net agter sy informele nedersetting geleë. Inwoners lê die skuld voor die deur van die dorp se bestuur, wat volgens hulle huiwerig is om die dorp verder te ontwikkel.Tydens ’n besoek deur ons susterkoerant Namibian Sun, was die munisipaliteit se vragmotor besig om vullis by die terrein af te laai, wat daagliks gedoen word.Uarundjumbu Tjikurujimbi het gesê hy besoek elke dag die vullisterrein om ’n bestaan vir homself en sy gesin te maak.“Ons kom hierheen omdat ons niks by ons huise het om te eet nie en om staal te soek wat ons kan verkoop om kop bo water te hou,” het die 42-jarige gesê.Hy het bygevoeg dat hy, as ’n werklose pa van vier kinders, gedwing word om op die stortingsterrein rond te aas, wat hy al meer as ’n dekade lank doen.“Ons grawe ou staal op. Ons vind soms gebruikte bomme en enigiets kan gebeur,” het hy gesê.HEINING GESTEEL Op ’n vraag oor hoekom die gebied nie omhein is nie, het Matjandjara Tjihuura-Katurota, die uitvoerende hoof van die dorp, gesê die gebied was wel in die verlede omhein.“Ongelukkig het mense weens die hardnekkige droogte vanaf alle ander dele van die land na die dorp begin stroom om geleenthede op Opuwo te soek,” het sy gesê.Sy het bygevoeg dit het gelei tot vandalisme en die diefstal van die heiningmateriaal by die stortingsterrein.Tjihuura-Katurota het gesê die dorpsraad beplan om die stortingsterrein te skuif en die huidige een te sluit.“Namate die dorp groei, het sommige mense hulle hier gevestig en op dienste begin aandring. Gevolglik is die raad in gesprek met tradisionele owerhede sodat hierdie droom ’n werklikheid kan word.”Tot dusver het tradisionele owerhede grond toegeken sodat die dorp se grense uitgebrei kan word.Intussen beplan die raad om die vullisterrein te omhein en ’n veiligheidswag daar te stasioneer, het die uitvoerende hoof gesê. Weens finansiële beperkings is die implementering van hierdie plan egter vertraag.“Die raad het intussen besluit om ’n omgewingspraktisyn aan te stel wat die gebied sal monitor en ’n ander persoon wat die sortering van afval en die bestuur daarvan sal behartig,” het sy gesê.“Ons glo dat daar ná die verskuiwing van die stortingsterrein geen mense in hierdie gebied vir kos sal rondskarrel nie. Die nuwe perseel sal omhein word en ’n veldtog sal oor higiëne en veiligheid van stapel gestuur word sodat inwoners die gevaar kan verstaan,” het Tjihuura-Katurota gesê.– republikein@republikein.com.na

Mense, diere aas vir kos by Opuwo-vullisterrein

Kommentaar

Republikein 2025-06-18

Meld asseblief aan om kommentaar te lewer

Mense, diere aas vir kos by Opuwo-vullisterrein

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie