Khomasstreek takel tienerswangerskappe

Die afgelope drie jaar het tienerswangerskappe in die Khomasstreek meer as verdubbel. Die syfer het geklim vanaf 246 gevalle in 2019 tot 598 in 2021. Die voorsitter van die Khomas-streekraad, mnr. John Moonde, sê van die swangerskappe in 2021 was nie dié individue se eerste swangerskappe nie. “Ek is bewus gemaak van gevalle waar leerlinge saam met hul kêrels woon en saam met hul kinders se pa’s – wat gewoonlik ouer mans is – woon,” sê Moonde. Die goewerneur van Khomas, me. Laura McLeod-Katjirua, glo geslagsgebaseerde geweld en geslagsongelykheid dra ook tot leerlingswangerskappe in dié streek by. “Geweld teen vroue en meisies is ’n uiterste manifestasie van geslagsongelykheid,” sê sy. Me. Rosa Namises, die direkteur van Women Solidarity Namibia, het na die hoë voorkoms van kinderhuwelike in Namibië verwys ná onlangse mediaberigte beweer het 64 000 meisies en vroue is voor die ouderdom van 18 getroud. Namises sê ’n beraamde 90% van kinders van meisies tussen die ouderdomme van 15 en 19, is binne die huwelik gebore. Die impak van armoede op leerlingswangerskappe word egter nie geïgnoreer nie. Met meer as 43% van Namibiërs wat in multidimensionele armoede vasgevang is, bestaan daar geen twyfel dat talle skoolmeisies in ongewenste omstandighede beland as gevolg van hul ekonomiese status nie, volgens die Namibië multidimensionele armoede-indeks. Die indeks meen kinders dra die swaarste aan die las van armoede. In ’n poging om geslagsgebaseerde geweld en tienerswangerskappe te bekamp, is ’n gemeenskaps- en skoolprojek oor die bewustheid van geslagskwessies, en die bestuur en voorkoming van tienerswangerskappe van stapel gestuur. Volgens me. Emilie Haipinge, die koördineerder vir die Khomasstreek se gesondheidstaakmag vir skole, sal hierdie projek tweeledig wees. Die projek beoog om deur bewusmaking en opvoeding tienerswangerskap te voorkom, en om deur die nodige ondersteuning jong ouers aan te moedig om hul skoolloopbane te voltooi. – irene-mari@erongo.com.na

Khomasstreek takel tienerswangerskappe

Kommentaar

Republikein 2025-09-18

Meld asseblief aan om kommentaar te lewer

Khomasstreek takel tienerswangerskappe

Kommentaar

Republikein 2025-09-18

Meld asseblief aan om kommentaar te lewer

MELD AAN

Advertensie