Kenner gee mening oor onlangse ouditverslae

“Daar moet gevolge te wees en daar is nie gevolge nie.”Só sê die politieke kenner prof. Johan Coetzee van die Namibië Universiteit vir Wetenskap en Tegnologie (Nust) oor die ongunstige ouditmenings wat die ouditeur-generaal onlangs oor die geldsake van verskeie munisipaliteite uitgereik het. Hy glo daar moet politieke belang daarin wees om ’n gunstige ouditverslag te bekom. “Politieke belang is een van die grootste veranderlikes wat ’n kultuur van onverantwoordelikheid en onverantwoordbaarheid kan skep,” sê hy. “As mense nie polities aanspreeklik gehou word nie, dan skep jy sistemiese probleme – soos dit nou met Grootfontein uitgekom het, waar die ouditeur-generaal spesifiek ‘sistemiese probleme’ genoem het, wat beteken dis nie ’n enkele probleem nie, dis in ’n netwerk verweef – en dis ’n kultuur wat in Namibië bestaan. “Dit is nie ’n uitsondering nie – Okahandja, Keetmanshoop – ons sien die hoeveelheid geld wat daar nie rekenskap voor gegee kan word nie en dan is dit so lank na die tyd,” sê Coetzee. Die feit dat ouditverslae jare na die tydperk wat hersien word, uitgereik word, belemmer volgens hom aanspreeklikheid. “Die probleem met ouditverslae in die algemeen is dat dit na die tyd is. Die ouditverslae wat nou in die parlement ter tafel gelê is, is van Junie 2020 in die geval van Grootfontein en die meerderheid van die ander munisipaliteite. “Dan vra jy jouself af; wat is die doel daarvan? Hoe moet dit verander word? Dit kan en moet verander word. Ons het die vermoë om dit te verander, maar dit lê weer by die politieke dryfveer en die wil om dit te verander,” sê hy. Munisipaliteite is dikwels onder die bestuur van ’n nuwe raad teen die tyd dat die ouditeur-generaal sy ouditmening uitreik. “In die geval van Grootfontein is dit drie jaar gelede en was dit ’n vorige raad. Dan is daar ’n nuwe raad aan stuur van sake wat deur ’n nuwe politieke party oorheers word. Hulle sit dan met die probleem om die bestaande probleme op te los voordat hulle kan voortgaan en goeie finansiële internasionale rekeningkundige beginsels in plek stel en meer professionaliteit kan inbring,” verduidelik Coetzee. Volgens Coetzee is Jan Alleman nie sonder blaam nie en moet almal aktief in plaaslike politiek betrokke raak. “Die mense raak nie betrokke nie. Daar is ’n legio sistemiese probleme wat getakel moet word, nie net polities nie, maar ook gedryf deur die mense wat meer betrokke moet raak.”“Die mense self is ook in ’n stryd om oorlewing gewikkel en hulle het nie altyd die finansiële kundigheid om finansiële state te verstaan nie,” sê hy.Coetzee stel voor dat lede van die publiek begin deur munisipale raadvergaderings en streekraadsvergaderings minstens een keer per maand by te woon. Hy stel ook voor dat die parlement daad by woord sit wanneer die ouditeur-generaal sy mening oor munisipaliteite se finansiële sake uitreik. “Die parlement moet dit aanvaar of nie aanvaar nie en hulle moet sê hoekom, dan moet daar opgetree word,” sê hy. Volg Coetzee se volledige gesprek op Network Media Hub (NMH) se Afrikaanse aktualiteitsprogram, Kletskompas, vandag om 12:30 op NTV (DStv kanaal-285 en GOtv kanaal-25), asook oneuptwo.com. – irene-mari@nmh-hub.com.na

Kenner gee mening oor onlangse ouditverslae

Kommentaar

Republikein 2026-02-03

Meld asseblief aan om kommentaar te lewer

Kenner gee mening oor onlangse ouditverslae

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.