Katutura-inwoners soek antwoorde

Elizabeth Kheibes - Ontstoke Katutura-inwoners het gister voor Stad Windhoek (CoW) se afdeling vir skuldbestuur saamgedrom en aangedring op antwoorde oor die skuld van meer as N$520 miljoen wat glo afgeskryf sou word.Die inwoners sê die munisipaliteit het verlede jaar belowe om sekere skuld af te skryf, maar het sedert November verlede jaar nog geen verdere woord daaroor gerep nie. Luidens ’n brief van die Katutura-inwonerskomitee aan die munisipaliteit se bestuur is ’n aankondiging oor skuldverligting op 30 November 2023 gemaak en raadslede het dit as ’n Kersgeskenk beskryf. Dié aankondiging was egter volgens die inwoners vaag en nog ’n aankondiging op 14 Desember het steeds nie antwoorde opgelewer nie. Inwoners het gister daarop aangedring om die munisipaliteit se uitvoerende hoof, Moses Matjayi, te sien en volgens hulle “uit die perd se bek” te hoor wat die vertraging veroorsaak om die skuld af te skryf.Die munisipaliteit se woordvoeder, Lydia Amutenya, het gesê Matjayi het elke kwessie wat deur die inwoners geopper is, persoonlik met hulle opgeneem in plaas daarvan om bloot ’n voorbereide dokument aan hulle te oorhandig. Volgens Amutenya sal die registrasie vir skuldverligting op 15 Februarie begin en voorsiening maak vir 100%-verligting op kapitale bedrae en rente vir pensioenarisse en 50% vir besighede en “gewone” inwoners.Pensioenarisse wat ná 30 November verlede jaar 60 jaar en ouer geword het, is volgens haar die enigste senior burgers wat vir die skuldverligting oorweeg sal word. Met verwysing na skuldverligting vir boedels, sal dit net toegestaan word indien die oorledene 60 jaar en ouer was toe hy/sy dood is. Enige persoon wat voor dié ouderdom gesterf het, kom nie in aanmerking vir skuldverligting nie. Inwoners, onder leiding van Shaun Gariseb, het gesê wanneer hulle die CoW nader om betalings te maak, word hulle weggestuur met die opdrag om nog geld te bring.Ellen Johannes (68) het op haar beurt gesê wanneer hulle geld het om hul uitstaande rekeninge af te betaal, word daar aan hulle gesê dis nie genoeg nie.“Ek is ’n pensioenaris met geen inkomste en ondersteuning nie. My man is 24 jaar gelede dood en sedertdien is ek met skuld gelos wat ek nie kan betaal nie.” Windhoek se voormalige burgemeester, Sade Gawanas, het aan inwoners verduidelik sekere regulasies geld vir die betaling van skuld, wat gevolg moet word. “Vir alle inwoners is daar ’n minimum bedrag wat vir die uitstaande skuld betaal moet word. Die munisipaliteit vereis ’n betaling van nie minder nie as ’n derde van die totale uitstaande bedrag om verdere reëlings vir afbetaling te begin,” het sy gesê.Volgens die munisipaliteit moet inwoners ’n voorafbetaalde water- en kragmeter hê of daarvoor aansoek gedoen het om vir skuldverligting te kwalifiseer. “Indien julle nie toegang tot voorafbetaalde meters het nie, sal ons julle help om aansoek te doen wanneer julle vir skuldverligting registreer, sodat julle kan kwalifiseer,” het Amutenya gesê. – republikein@republikein.com.na

Katutura-inwoners soek antwoorde

Kommentaar

Republikein 2025-06-17

Meld asseblief aan om kommentaar te lewer

Katutura-inwoners soek antwoorde

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie