Hoop kom uit die hart

Gee is iets wat uit die hart moet kom. 

Dít is die woorde van Anna-Oletu Shaulwa, stigter van die TBJ Hope-liefdadigheidsorganisasie, wat ondersteuning bied aan kwesbare lede van haar gemeenskap op Otjiwarongo terwyl sy terselfdertyd haar eie informele besigheid bestuur. 

“Wanneer jy iemand help, moet jy niks terug verwag nie. Jy moet dit doen omdat jy ’n behoefte raaksien en ’n verskil wil maak,” het sy gesê. 

In ’n onderhoud met Republikein Sondag het Shaulwa vertel hoe haar passie om ander te help gegroei het tot ’n liefdadigheidsinisiatief wat kos, ou klere en ander noodsaaklike items voorsien aan mense wat moeilike omstandighede in die gesig staar. 

“Dit gaan nie net daaroor om vir iemand kos of klere te gee nie. Soms moet mense ook weet dat iemand omgee vir hulle en dat hulle nie alleen is nie,” het sy gesê. 

Vir Shaulwa is die begeerte om terug te gee ’n waarde wat deur haar familie oorgedra is, wat haar die belangrikheid geleer het om ander te help sonder om erkenning of persoonlike voordeel te verwag. 

Hoewel sy haar eie straatbesigheid bedryf waar sy tradisionele Oshiwambo-disse verkoop om vir haar familie te sorg, sê sy haar liefdadigheidswerk bly na aan haar hart en beïnvloed haar dit nie haar vermoë om na haar huishouding om te sien nie. 

GEEN MAKLIKE TAAK 

Sy erken egter dat dit nie altyd ’n maklike taak is om ander te ondersteun nie, veral wanneer hulpbronne beperk is en die aantal mense wat hulp soek, aanhou toeneem. 

“Soms wil jy almal help, maar jy moet ook werk met wat jy het,” het sy gesê. 

“Daar is mense wat elke dag meer van jou verwag, en dit kan uitdagend wees, maar dit keer my nie om te help waar ek kan nie.” 

Shaulwa se nie-winsgewende liefdadigheidsorganisasie is volledig geregistreer, en sy soek nou na bykomende fondse en vennootskappe om TBJ Hope se bedrywighede uit te brei en meer mense in nood te bereik. 

Sy glo dat die organisasie met meer ondersteuning kan groei verby die kleinskaalse hulp wat dit tans bied en ’n groter impak binne die gemeenskap kan hê. 

Ten spyte van die uitdagings wat sy teëkom, bly Shaulwa verbind tot haar missie om eenheid te skep en ’n kultuur van ondersteuning binne die gemeenskap aan te moedig. 

Sy sê haar doel is nie om lofprysinge te ontvang nie, maar eerder om ander te inspireer om te verstaan dat selfs klein dade van vriendelikheid hoop kan bring vir dié wat deur moeilike tye gaan. 

– [email protected]