GBV-slagoffers aan eie lot oorgelaat

Slagoffers en diegene wat skuiling teen geslagsgeweld (GBV) soek, kan sonder heenkome gelaat word ná die besluit om skuilings landwyd te sluit weens die ministerie van geslagsgelykheid, armoede-uitwissing en maatskaplike welsyn se beweerde gebrek aan geld om dié instellings te onderhou.Die sluiting is in stryd met aanbevelings tydens die onlangse nasionale manskonferensie, waar besluit is dat méér hulpbronne beskikbaar gestel moet word vir die oprigting van strukture om skuiling aan geweldslagoffers te bied. Nog ’n aanbeveling by die konferensie was die voorsiening van geriewe vir geestesgesondheidsorg om die kwessie van toksiese manlikheid te takel.KOMMERWEKKENDVolgens polisiestatistiek is 3 499 sake van geslagsgeweld teenoor vroue in 2021 aangemeld. Hiervan was 477 voorvalle van verkragting en 31 is moordvoorvalle. Hierteenoor is 1 054 sake van GBV teenoor mans aangeteken – 41 verkragtings en 20 moordvoorvalle. Teenoor minderjariges is 767 gevalle van GBV aangeteken – 577 verkragtings en agt moordvoorvalle. In die Oshanastreek alleen is 69 verkragtings glo in 2019 aangeteken, 97 in 2020, 86 in 2021 en tot dusver 81 in 2022. Die afgelope drie maande het 14 mans en vyf vroue hul eie lewens geneem.Volgens syfers verskaf deur die betrokke ministerie het Namibië tans agt aktiewe skuilings vir vroue wat slagoffers van huishoudelike geweld is, naamlik in die streke Khomas, ||Kharas, Omusati, Zambezi, Kavango-Oos, Kunene, Oshikoto en Ohangwena.Die skuilings verskaf ook beradingsdienste aan slagoffers van GBV wat noodgedwonge in onveilige omgewings moes bly.WAARHEEN NOU?Twee maatskaplike werkers wat op voorwaarde van anonimiteit met ons susterkoerant Namibian Sun gepraat het, sê hulle het slagoffers van GBV, insluitend kinders, wat by skuilings landwyd gehuisves word. Om dié skuilings se deure te sluit – veral tydens die feesseisoen – behoort volgens die twee nie eens oorweeg te word nie. “Waar sal ek my mense plaas? Ek werk met ’n hele aantal slagoffers by die skuilings. Ek het ook ’n paar by die kinderhuis in Windhoek geplaas. Sal die ministerie vir ons sê om hierdie mense by huise te akkommodeer of wat moet gebeur? Ons is reeds besig om die skade wat deur die pandemie meegebring is reg te stel,” het sy die situasie betreur.Die twee sê die Covid-19-pandemie het reeds bestaande maatskaplike kwessies vererger en die krake blootgelê binne politieke, maatskaplike en ekonomiese stelsels, insluitend die toegang tot gesondheidsdienste en maatskaplike beskerming. Sommige slagoffers moes die grootste deel van die moeilike inperkingstydperk saam met hul mishandelaars deurbring, vertel hulle.Die werkers sê weens die pandemie en gepaardgaande isolasie is vroue, meisies en seuns verder aan GBV en skadelike praktyke blootgestel.MINISTERIE REAGEERNamibian Sun het verneem die skuilings is reeds oor die komende sluitings ingelig. Diegene wat sulke skuilings in die streke bestuur, wou nie kommentaar lewer nie en het alle navrae na die ministerie se hoofkantoor verwys. Sommige het aangedui hulle is gewaarsku om niks te sê nie.Me. Doreen Sioka, minister van geslagsgelykheid, armoede-uitwissing en maatskaplike welsyn, het alle navrae na die waarnemende uitvoerende direkteur, me. Martha Mbombo, verwys.Mbombo het egter ontken dat dié skuilings gaan sluit en beweer sy het Maandag die papiere onderteken vir die beskikbaarstelling van geld om die vrywilligers by die skuilings betyds te betaal.“Ons maak geen skuilings toe nie. Ons sien om na die slagoffers in ons sorg,” het sy gesê.Haar kommentaar volg nadat Namibian Sun selfs meer klagtes van maatskaplike werkers ontvang het dat die sluitings glo voortgaan en die skuilings dus nie meer slagoffers sal kan huisves nie.Mbombo het aan die koerant toegang tot die skuilings geweier en gesê dit is plekke van veiligheid en joernaliste het geen rede om dit te besoek nie.– republikein@republiken.com.na

GBV-slagoffers aan eie lot oorgelaat

Kommentaar

Republikein 2025-08-05

Meld asseblief aan om kommentaar te lewer

GBV-slagoffers aan eie lot oorgelaat

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie