Eerste minister was ‘op die rand van selfdood’

Eerste minister Elijah Ngurare het ’n rare en diep persoonlike onthulling gemaak dat hy een keer selfdood oorweeg het gedurende ’n tydperk van ernstige finansiële nood tussen 2015 en 2019.In ’n openhartige Facebookplasing het Ngurare gesê hy het met verlammende skuld gesukkel en dit het byna daartoe gelei dat beide sy huis en motor teruggeneem is, wat hom laat oorweeg het om sy eie lewe te neem sodat sy gesin by sy lewensversekering kon baat.“Die gedagte het by my opgekom om selfdood te pleeg met die hoop dat my gesin by my lewensversekering kon baat en hulle die skuld ten volle kon afbetaal,” het hy geskryf.Ngurare het sy oorlewing toegeskryf aan die onwrikbare ondersteuning van sy geliefdes en vriende gedurende daardie donker hoofstuk in sy lewe. “Danksy die ondersteuning van familie, vriende en kamerade het ek daarin geslaag om daardie gedagtes af te weer. . . Finansiële stres gebeur met die meeste van ons en ek betaal steeds die skuld af,” het hy gesê.Die eerste minister se emosionele getuienis kom in die nasleep van die tragedie verlede week toe drie onderwysers in die Ohangwenastreek selfdood gepleeg het. Een van die slagoffers het na bewering oor sy finansiële probleme in ’n selfdoodbrief geskryf. ‘HOU AAN VEG’Ngurare het die geleentheid gebruik om ’n hartroerende pleidooi te rig aan Namibiërs wat soortgelyke ontberinge in die gesig staar. “Aan wie ook al hulle op die rand van selfdoodgedagtes bevind, moet asseblief nie daarmee voortgaan nie. “Hou aan veg, die son sal weer skyn te midde van al die swaarkry van die lewe. Om te lewe is van onskatbare waarde, veral vir jou familie.”Hy het verder ’n beroep op beide die openbare en private sektor gedoen om saam te staan om die groeiende krisis van finansiële stres onder burgers aan te pak.“Kom ons vat hande as ’n nasie om diegene in finansiële nood te red. Met ons almal bedoel ek beide die regering en die private sektor.”Volgens die Wêreldgesondheidsorganisasie (WHO) is Namibië die Afrikaland met die hoogste aangetekende selfdoodgevalle en 11de in die wêreld.Selfdoodslagoffers is meestal mans tussen 20 en 40 jaar oud met finansiële beperkings as ’n groot bydraende faktor. – republikein@republikein.com.na

Eerste minister was ‘op die rand van selfdood’

Kommentaar

Republikein 2025-11-05

Meld asseblief aan om kommentaar te lewer

Eerste minister was ‘op die rand van selfdood’

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.