#BeFree plaas fokus op GBV

Sestien dae van aktivisme teen geslagsgebaseerde geweld en moord op vroue (GBV-F) het vanjaar by die #BeFree-jeugkampus in Windhoek afgeskop.Dit is ’n jeuggeleide gemeenskapsinisiatief wat dialoog en teater kombineer om bewusmaking oor geweld teen vroue en kinders te verhoog.Die geleentheid word onder die tema “UNiTE to End Digital Violence Against All Women and Girls” aangebied. Die veldtog het ten doel om die gemeenskap te mobiliseer deur middel van uitvoerende kunste en leerervarings wat veilige ruimtes skep en gesprekke oor digitale geweld, GBV-F en geweld teen kinders aanwakker.Die One Economy Foundation bied die program in samewerking met die ministerie van geslagsgelykheid en kinderwelsyn, die Deutsche Gesellschaft für Internationale Zusammenarbeit (GIZ), verteenwoordigers van die Namibiese polisie (Nampol) se eenheid vir kubermisdaad en die aanlyn uitbuiting van kinders, die Duitse ambassade, die Namibiese Studenteorganisasie (Nanso), die Verenigde Nasies se Kinderfonds (Unicef) en die streekgeslagtaakspan aan.‘STILTE IS NIE MEER ’N OPSIE NIE’In haar verwelkomingsboodskap verlede week het dr. Veronica Theron, direkteur van gesondheid en welstand by die One Economy Foundation, beklemtoon die tema is aangepas na “UNiTE to end digital violence” om die hele Namibiese bevolking te betrek.Sy beskryf die tema as “kragtig, tydig, relevant en persoonlik vir almal wat met jongmense werk”.Volgens statistiek wat sy gedeel het, is 4 400 GBV-voorvalle deur Nampol tussen April 2024 en Februarie 2025 aangemeld – insluitend 1 345 voorvalle van verkragtings. Intussen is meer as 542 selfdoodvoorvalle en 102 900 voorvalle van geestesgesondheid in 2024 aangemeld.“Hierdie syfers is nie net statistieke nie,” het sy gesê.“Dis leerlinge in ons klaskamers, oorlewendes in ons #BeFree Cares-kliniek en kinders in ons gemeenskappe. Dit is ons bure, familie, vriende en soms is dit onsself.”Theron beklemtoon die #BreakFree-beweging bestaan aangesien stilte eenvoudig nie meer ’n opsie is nie.Sy het verder verwys na die studie “Disrupting harm” van 2022, wat toon 9% van plaaslike internetgebruikers tussen 12 en 17 jaar word aan voorbeelde van aanlyn seksuele uitbuiting blootgestel. Dit kom neer op ongeveer 20 000 kinders landswyd. Sy waarsku die werklike syfers is waarskynlik hoër, aangesien talle kinders huiwerig is om hul ervarings te deel.VOORTDURENDE ONDERSTEUNINGDie #BreakFreeFromViolence-veldtog is geskep om geslagsgebaseerde geweld en moorde op vroue dwarsdeur die jaar te takel.Deur die One Economy Foundation se welstanddepartement word verskeie dienste gelewer.Dit sluit onder meer krisis-ingrypings en saakbestuur, hofvoorbereiding vir kwesbare getuies, groepterapie en opleiding vir diensverskaffers in, asook navorsing, voorkoming en bewusmaking, traumaverligting, die ondersteuning vir geestesgesondheid, jeuggeleide gesprekke, manlike betrokkenheid en die skep van veilige ruimtes – aanlyn en interpersoonlik.Theron het ook gesê die vestiging van slagoffer-vriendelike ruimtes sal ondersteun word deur skenkings van meubels, watertoestelle en kuns- en opvoedkundige materiaal aan die kantoor van die aanklaer-generaal en Nampol se eenhede vir aanlyn seksuele uitbuiting en -misbruik van kinders en GBV.KUBERVEILIGHEIDSenior polisie-inspekteur Gabriel Paxula se kubermisdaadeenheid het meer inligting oor kubermisdaad, seksuele voorbereiding en praktiese stappe om jouself teen internetgebaseerde geweld en mishandeling te beskerm, insluitend sterk wagwoorde, verskaf asook die beskerming van persoonlike inligting en die blokkering van verdagte kontakte.Speurinspekteur Vaino Werner van OCSEA het gewaarsku dat aanlyn oortreders dikwels vals identiteite gebruik en selfs voorgee dat hulle kinders of tieners is om toegang tot jongmense te verkry.TEATERDie program het ook ’n interaktiewe teaterstuk Digital Danger deur Pegasus Entertainment Production ingesluit. Die stuk het kwessies soos onder meer kuberboelies, seksuele voorbereiding en wraakpornografie ondersoek. Elke toneel is eers met sy gevolge opgevoer, waarna die gehoor bespreek het wat fout geloop het. Daarna is die toneel herspeel met die regte optrede en professionele ingrypings. ’n Metode wat kritiese nadenke en leer bevorder.‘GEWELD IS NIE SEISOENAAL NIE’In haar afsluiting het Louise Uiras, die waarnemende adjunkdirekteur in die Khomasstreek in die ministerie van geslagsgelykheid en kinderwelsyn, almal vir hul bydraes en betrokkenheid bedank.“Aktivisme teen GBV moet elke dag plaasvind, want geweld is nie seisoenaal nie,” het sy beklemtoon.Die #BreakFree-span bedank al sy vennote en ondersteuners vir hul rol in die versterking van hierdie noodsaaklike gemeenskapsinisiatief.– republikein@republikein.com.na

#BeFree plaas fokus op GBV

Kommentaar

Republikein 2026-01-27

Meld asseblief aan om kommentaar te lewer

#BeFree plaas fokus op GBV

Kommentaar

Republikein 2026-01-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.