14 098 dié maand sonder pensioen

Net meer as 14 000 begunstigdes van maatskaplike toelaes oraloor die land sal vandeesmaand sonder inkomste wees en sal teen volgende week weer via die nuwe stelsel moet registreer as hulle hul pensioenuitbetalings vir Julie wil ontvang.In Augustus sal geverifieerde begunstigdes wat die herregistrasieproses gevolg het, hul uitbetalings vir Augustus en Julie ontvang. Diegene wat egter eers ná die sperdatum op 15 Julie herregistreer, sal hul toelae vir dié twee maande eers in September ontvang.Só het me. Esther Lusepani, die uitvoerende direkteur vir geslagsgelykheid, armoede-uitwissing en maatskaplike welsyn, bevestig en gesê dit is ‘n “hartseer” situasie.Luidens ‘n verklaring wat die ministerie uitgereik het, is die ongerymdhede weens die feit dat sommige van die data wat oorgedra is vanaf die maatskaplike ondersteuningstelsel (SAS) – wat deur die geïntegreerde maatskaplike ondersteuningstelsel (ISAS) vervang is – nie positief teen die Nasionale Bevolkingsregisterstelsel (NPRS) geverifieer kon word nie.Dit sluit die verkeerde spelling van name, verkeerde datums, of valse identiteitsdokumente of gevalle van identiteitsdiefstal in, en gevolglik het die stelsel 18 503 begunstigdes verwerp – wat 4 156 oorlede begunstigdes en 249 verstrykte ongeskiktheidstoelaes ingesluit het.“Ons vermoed sommige is gevalle van identiteitsdiefstal en ander foute. Wanneer iemand nie opdaag om teen 15 Julie te herregistreer nie, dan kan dit wees dat hulle onregverdig voordele ontvang het. Ons het gevalle waar een individu tot twee of drie pensioenuitbetalings ontvang. Hierdie nuwe stelsel is betroubaar, maar die situasie is baie, baie betreurenswaardig. Dit sal egter groot doeltreffendheid en ‘n paar besparingsgeleenthede vir die regering skep as gevolg van bedrieglike eise. Wanneer iemand sterf, sal die stelsel hulle outomaties verwyder,” het Lusepani gesê. Die ministerie het die bogenoemde verklaring uitgereik terwyl honderde pensioenarisse, mense met gestremdhede en ander begunstigdes al vanaf vroegoggend Maandag in rye in die koue voor die welsynskantoor in Khomasdal staan en desperaat vir antwoorde wag.Minister Doreen Sioka het bevestig hulle is daarvan bewus dat 14 098 pensioenarisse geraak word en het die geraakte individue gevra om asseblief geduldig te wees.“Die skuif is lankal beplan om die stelsel skoon te maak met die hulp van die ministerie van finansies, en word gedoen deur die nuwe stelsel wat aan die ministerie van binnelandse sake gekoppel is,” het sy gesê.Sy het bygevoeg hulle sal aandag gee aan kapasiteitsuitdagings om die herregistrasieproses te vergemaklik.Die skare in Khomasdal bestaan grotendeels uit pensioenarisse met gesondheidsuitdagings, diegene wat aan epilepsie ly, of mense met terminale siektes, insluitend ‘n man wat sy dialisesessies gemis het, net om in die ry te gaan staan en wag op ‘n verduideliking.“Ek het bloeddruk en vandag was ek veronderstel om 06:00 na die (dialise) masjien toe te gaan, maar ek is nou hier omdat ek nie my geld gekry het nie. Hulle sê net vir my om in die ry te staan en ek kan enige tyd flouval,” het hy gesê.Verskeie ma’s van kinders wat met epilepsie leef, het ook in die ry gestaan om uit te vind wat “met die geld gebeur het”.Volgens een ma dek die geld nie net die basiese behoeftes van hierdie kinders nie, maar kan hierdie skielike onderbreking ernstige gevolge vir hul gesondheid inhou. “Ons moet ook medikasie daarvan koop, en die medikasie vir epilepsie is baie duur. Een pil kos N$1 200, ’n ander een N$800 en nog een kos N$200. Daar is ook ander dinge wat ons nodig het om dit te kry, maar die regering sny net sonder om hieraan te dink,” het sy gesê. – republikein@republikein.com.na

14 098 dié maand sonder pensioen

Kommentaar

Republikein 2025-05-02

Meld asseblief aan om kommentaar te lewer

14 098 dié maand sonder pensioen

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie