Rundu sonder ’n brandweerwa

Die dorpsraad van Rundu maak staat op die brandbestrydingsvoertuig van die Namibië Lughawemaatskappy (NAC) wat by dié Noordedorp se lughawe gestasioneer is om op brandvoorvalle te reageer.Dit nadat die raad se enigste brandweerwa onklaar geraak het en steeds buite werking is, wat kommer oor die dorp se noodreaksievermoë wek.Die dorpsraad se woordvoerder, Benjamin Makayi, het bevestig die brandweerwa is weens meganiese probleme buite werking.“Aanvanklik het ons ’n probleem met die koppelaarplaat gehad en dit is herstel, maar nou het ons steeds ’n probleem met ’n pomp en die voertuig moet na Okahandja geneem word vir die montering van die pomp,” het Makayi gesê.Hy het bevestig die voertuig is steeds buite werking, maar dat herstelwerk aan die gang is.Hoewel senior raadslede aan Republikein gesê het dat die brandweerwa die afgelope drie jaar buite werking is, het Makayi gesê hy kon nie die presiese tydsduur bevestig nie.“Ek kan nie bevestig nie, maar daar is aandag daaraan gegee,” het hy gesê.Met die munisipale brandweerwa wat onbeskikbaar is, het die NAC se brandbestrydingsvoertuig die dorp se primêre noodreaksie-eenheid geword. Makayi het gesê dié reëling is deel van ’n voortgesette vennootskap tussen die raad en die lughawe.“Die Namibië Lughawemaatskappy het gehelp. Selfs al werk die voertuig, help ons mekaar," het hy gesê.Makayi het die lang herstelproses aan die regering se verkrygingsprosedures toegeskryf en gesê die verkryging van gespesialiseerde onderdele kan lank neem, veral as dit nie in Namibië beskikbaar is nie.Hy het bygevoeg openbare verkrygingsregulasies verhoed die raad om onderdele op dieselfde manier as ’n private voertuigeienaar aan te koop.Die langdurige afwesigheid van ’n munisipale brandweerwa het ook breër kommer laat ontstaan oor die beskikbaarheid van gespesialiseerde reddingstoerusting tydens noodgevalle, insluitend padongelukke waar hidrouliese reddingsgereedskap, algemeen bekend as die “kake van die lewe”, nodig is om vasgekeerde slagoffers te bevry.Toe Makayi gevra is oor die raad se reddingskapasiteit, het hy gesê hulp word verskaf wanneer dit versoek word, maar hy het nie uitgebrei oor die beskikbaarheid van gespesialiseerde reddingstoerusting nie.Hy het gesê die raad is steeds van voorneme om sy brandbestrydingsvermoë te versterk deur ’n bykomende brandweerwa aan te skaf, maar finansiële beperkings vertraag steeds daardie planne.“Dis nie dat die raad planne laat vaar het om ’n bykomende brandweerwa aan te skaf nie. Die raad moet ander belangrike verpligtinge prioritiseer en natuurlik speel finansiële beperkings ook ’n rol,” het Makayi gesê.Hy het bygevoeg die aankoop van bykomende brandbestrydingstoerusting sal van toekomstige begrotingstoekennings en beskikbare finansiering afhang.– eliot@nmh-hub.com.na

Rundu sonder ’n brandweerwa

Kommentaar

Republikein 2026-08-25

Meld asseblief aan om kommentaar te lewer

Rundu sonder ’n brandweerwa

Kommentaar

Republikein 2026-08-25

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.