Polisie wag op DNS-uitslae

Die Namibiese polisie (Nampol) in die Kavango-Oosstreek sê hulle wag op forensiese uitslae nadat hulle DNS-monsters van verskeie persone van belang versamel het in ’n ondersoek na ’n vermeende reeksverkragter wat vroue op Rundu terroriseer.

Die saak het wydverspreide vrees op die dorp veroorsaak, nadat verskeie vroue op Rundu aangemeld het dat hulle deur ’n onbekende man met ’n masker aangeval en verkrag is.

Tydens van die voorvalle het die verdagte na bewering die slagoffers met ’n mes gedreig, voordat hy hulle aangerand het. 

Owerhede het bevestig 18 sake van verkragting is sedert Januarie op Rundu aangemeld. Agt van die voorvalle is positief aan die gemaskerde verdagte gekoppel weens ooreenkomste in die verdagte se modus operandi.

In ’n onderhoud met Republikein gister het die koördineerder vir misdaadondersoeke van Nampol in dié streek, adjunk-kommissaris Bonifatius Kanyetu, die jongste verwikkeling bevestig.

Volgens hom het ondersoekbeamptes beduidende vordering gemaak; hulle is egter nog nie in ’n posisie om die identiteite van diegene wat onder die loep geneem word, openbaar te maak totdat forensiese prosesse voltooi is nie.

“Die enigste ding waaroor ek julle ten minste kan op hoogte hou, is dat die voorvalle nie meer plaasvind nie,” het Kanyetu by navraag gesê.

Hy het verduidelik die polisie het geleidelik individue geïdentifiseer wat as relevant vir die ondersoek geag is en het mettertyd weefselmonsters van almal versamel.

“Dit is geleidelik gedoen. Kies hierdie een, neem die monster; kies daardie een, neem die monster; kies ’n ander een, neem die monster. En ons wag vir die uitslae,” het hy gesê.

Kanyetu sê sedert die persone van belang vir weefselmonsters ingebring is, is geen verdere aanvalle met dieselfde modus operandi op Rundu aangemeld nie.

“Sedert ons daardie mense ingebring en hul monsters geneem het, is daar geen risiko nie, niks van daardie aard nie – geen masker, niks nie,” het hy gesê.

Terwyl sy opmerkings kan dui op ’n moontlike deurbraak in die hoëprofielsaak, het Kanyetu beklemtoon dat die polisie steeds wag vir forensiese bevestiging voordat hulle verdere regstappe doen.

“Ons wag vir die uitslae. As dit kom en dit is hierdie mense, sal ons hulle in hegtenis neem en aankla,” het Kanyetu gesê.

Hy wou nie sê hoeveel mans se weefselmonsters geneem is nie. Hy het gewaarsku dit kan die ondersoek in gevaar stel of die rigting kan onthul waarin dit beweeg.

“Ons kan geen leidraad aan hierdie verdagtes gee nie. Ons sal die nasie op hoogte hou sodra die uitslae beskikbaar is,” het hy gesê.

Die mees onlangse voorval wat aangemeld is en met die saak verband hou, het in Februarie in Kehemu plaasgevind. Toe is ’n 25-jarige vrou na bewering met ’n groot mes gedreig en deur ’n onbekende man met ’n wit gesigmasker verkrag. Hy het haar huis binnegegaan terwyl sy haar kamer skoongemaak het.

Die polisie het gesê verkragtingsake wat gedurende die oorsigtydperk aangemeld is, het in gebiede soos Kaisosi, Ndama, Sauyemwa en ander dele van Rundu plaasgevind.

Kanyetu het ook gesê die polisie het die publiek betrek in reaksie op groeiende kommer, veral deur vroue raad te gee oor persoonlike veiligheidsmaatreëls en die belangrikheid daarvan om verdagte gedrag dadelik aan te meld.

“Wat openbare betrokkenheid betref, het ek met vroue gepraat oor verdedigingsmaatreëls wat hulle kan neem en die belangrikheid daarvan om die polisie onmiddellik te waarsku,” het hy gesê.

Hy het inwoners aangespoor om nie gerus te wees omdat geen onlangse voorvalle aangemeld is nie en gewaarsku dat hulle steeds waaksaam moet wees.

“Ons moet nie ontspan bloot omdat hierdie voorvalle tans nie plaasvind nie. Mense moet waaksaam bly,” het hy gesê.

– [email protected]