Nuwe vloot vir die Grootfontein

Die Grootfontein-munisipaliteit spog met ’n vloot van vyf nuwe Toyota-enkelkajuitbakkies ter waarde van N$1,4 miljoen.

Die voertuie sal strategies aan munisipale afdelings toegewys word, om ’n vinniger en meer doeltreffende reaksie op gemeenskapsbehoeftes te verseker.

“Dit is ’n belegging vir die raad en ons sal sorg dat ons dienste doeltreffend lewer,” het die burgemeester van Grootfontein, Morits Gaingob, gesê.

Volgens hom het die verouderde vloot meganisese uitdagings gehad en die herstel daarvan in munisipale werkswinkels het vir maande gesloer.

Die raad het voorheen voertuie en swaarmasjinerie gehad wat uit die 1970’s dateer, wat dienslewering beïnvloed en kommer onder inwoners laat ontstaan het.

Die nuwe bakkies sal met opsporingstelsels toegerus word om die ligging van voertuie, sowel as die bestuurders daarvan se gedrag te monitor. Daarbenewens beplan die munisipaliteit om die ouer swaarmasjinerie op ’n veiling te verkoop om geld te genereer vir die verkryging van moderne toerusting, insluitend ’n padskraper.

Gaingob het die belangrikheid beklemtoon dat die voertuie uitsluitlik vir munisipale dienste gebruik moet word.

“Hierdie voertuie is nie vir persoonlike gebruik nie, maar om vinnige en gehalte-dienste aan ons inwoners te lewer.”

Die nuwe bakkies sal soos volg toegewys word: Twee aan die tegniese departement vir die riool- en loodgietersafdeling, een aan omgewingsgesondheid, een aan die skooldepartement en een vir algemene gebruik vir die raad.

Die oorblywende voertuig, wat teen die einde van Maart verwag word, sal ook na omgewingsgesondheid gaan, met verdere toewysings wat beplan word sodra die ouer voertuie opgeknap is.

“Laat ons goeie en vinnige dienste lewer. Laat ons dit nie gebruik om ons kinders by die skool af te laai en rond te ry om inkopies te gaan doen nie. Laat ons dit gebruik om dienste aan die inwoners te lewer,” het Gaingob benadruk

– [email protected]