Kontant is koning

Stad Windhoek (CoW) se kontant en kontantekwivalente het van N$268 miljoen in Junie 2023 tot N$1,1 miljard in Junie vanjaar gegroei.

Dit volgens die CoW se uitvoerende hoof, Moses Matyayi, wat ’n dramatiese verbetering in die munisipaliteit se likiditeitsposisie aandui.

Matyayi, wat sy amp in Augustus 2023 aanvaar het, het dié syfers in ’n onderhoud met Network Media Hub (NMH) bekend gemaak oor die munisipaliteit se finansiële posisie en prestasie tydens sy ampstermyn van drie jaar.

Hy het gesê die munisipaliteit se likiditeitsposisie het met 69% verbeter, met sy bedryfsverhouding (current ratio) wat tussen Junie 2023 en Junie 2026 van 71 sent tot N$1,21 vir elke N$1 aan korttermynverpligtinge (current liabilities) gestyg het.

“Oor die afgelope drie jaar het inkomste met 13% toegeneem, wat op ’n groei van ongeveer N$616 miljoen neerkom,” het Matyayi gesê.

Hy het gesê die groeistrategie word deur twee sleuteldoelwitte gedryf: Om die munisipaliteit se finansiële volhoubaarheid te verbeter en om die situasie rakende finansiële tekorte, wat oor meer as ’n dekade ervaar is, om te keer.

“Die toename in inkomste is deur matige tariefaanpassings en die sistematiese uitskakeling van inkomsteverliese bewerkstellig, ondersteun deur die streng maandelikse monitering van prestasies,” het hy gesê.

Matyayi het gesê die verbetering in likiditeit word weerspieël in die groei van CoW se kontant en kontantekwivalente.

“Hierdie fondse word tans as reserwes gehou en aangewend om groot kapitaalprojekte vir instandhouding te finansier, terwyl dit ook die insameling van fondse vir kapitaalprojekte vir ontwikkeling ondersteun,” het hy verduidelik.

Hy het gesê die munisipaliteit verwag dat sy likiditeitsposisie verder sal verbeter sodra ’n onlangs ondertekende ooreenkoms met die regering vir die ruil van grond vir skuld geïmplementeer word.

“Met die implementering van die onlangs ondertekende ooreenkoms met die regering vir die ruil van grond vir skuld, sal die verhouding nader aan 200 sent beweeg – wat ons teiken is,” het Matyayi gesê.

Hy het gesê die verbeterings toon die impak van pogings om die munisipaliteit se finansies te versterk.

“Die beduidende verbetering in sowel om inkomste te genereer as likiditeit toon die doeltreffendheid van die munisipaliteit se finansiële bestuursinisiatiewe.

“Dit weerspieël ook bestendige vordering na ’n sterker en gesonder balansstaat, wat steeds die grondslag vir volhoubare dienslewering vorm," het hy gesê.

KONTANTPOSISIE

Ten spyte van die verbeterde kontantposisie het CoW ook hom tot skuldfinansiering gewend om infrastruktuur- en ontwikkelingsprojekte te finansier.

“Benewens hierdie prestasies het die munisipaliteit suksesvol N$660 miljoen deur skuldfinansiering ingesamel om strategiese infrastruktuur- en ontwikkelingsprojekte te finansier,” het Matyayi gesê.

“Dit weerspieël hernieude vertroue van leners, wat die munisipaliteit toenemend as ’n geloofwaardige en finansieel stabiele instelling beskou met ’n bewese rekord om sy verpligtinge na te kom,” het hy aan NMH gesê.

Hy het daarteen gewaarsku om die verbeterde finansiële posisie só te interpreteer dat Windhoek se finansiële beperkings iets van die verlede is.

“Ek glo CoW het vordering met die versterking van finansiële bestuur, bestuurspraktyke en institusionele stabiliteit gemaak, maar ek sou nie sinspeel dat die finansiële uitdaging verdwyn het nie.

“Daar is steeds ’n beduidende gaping tussen wat Windhoek in infrastruktuur moet belê en wat sy bestaande inkomstebasis op ’n volhoubare wyse kan voorsien,” het hy gesê.

FINANSIëLE DRUK

Die bekendmaking kom teen die agtergrond van ’n geskiedenis van finansiële druk by die munisipaliteit.

’n Verslag deur die ouditeur-generaal het voorheen finansiële tekortkominge by die munisipaliteit uitgewys, insluitend ’n tekort tussen korttermynverpligtinge en bedryfsbates soos op Junie 2023.

Matyayi het gesê die munisipaliteit wat hy in Augustus 2023 geërf het, het te kampe gehad met “institusionele, infrastruktuur- en finansiële druk” wat oor baie jare opgebou het.

Dit het agterstande met die instandhouding van infrastruktuur, druk op munisipale inkomste en skuldinvordering, ’n toenemende vraag na behuising en gedienste grond, die vinnige groei van informele nedersettings, verouderende infrastruktuur ingesluit, sowel as druk op paaie en openbare vervoer.

CoW het ook die koste gedra om dienste aan gemeenskappe te lewer wat nog nie ten volle in die formele munisipale inkomstebasis geïntegreer

was nie.

“Ons moet noodsaaklike dienste lewer, selfs wanneer die koste van daardie dienste nie ten volle verhaal kan word van die mense wat dit die nodigste het nie,” het hy gesê.

“Terselfdertyd het ons ’n verantwoordelikheid om die finansiële volhoubaarheid van die instelling te beskerm.”

– [email protected]