Malan is boereworskoning

Nuusredaksie

Kobus Malan is as Namibië se boereworskoning van 2026 gekroon ná die eindronde Saterdag van die Shoprite & Checkers Namibiese Champion-boereworskompetisie by Rooster & Co. in Windhoek.

Die kompetisie vier een van Namibië se mees geliefde kulinêre tradisies en bring begaafde boereworsmakers van regoor die land byeen om hul vaardigheid, passie en eg plaaslike geure ten toon te stel.

Nadat hulle deur die streekrondes gevorder en hul plekke onder vanjaar se finaliste verdien het, het die laaste aanspraakmakers in die hoofstad vir die beoordeling en kroning byeengekom. Elke finalis het sy eie resep, vakmanskap en vertolking van ’n eg Namibiese gunsteling na die finaal gebring.

Ná afloop van die beoordeling het Malan as algehele wenner uit die stryd getree en is amptelik as Namibië se boereworskampioen gekroon.

Die nuwe kampioen stap weg met N$150 000 in Shoprite & Checkers-koopbewyse as erkenning vir sy inskrywing en wenprestasie in vanjaar se kompetisie.

Collin Omari is die naaswenner en het N$100 000 in Shoprite & Checkers-koopbewyse ontvang, terwyl Jackson Kazombiaze derde geëindig en koopbewyse ter waarde van N$50 000 ontvang het.

Die kompetisie het ook die prestasies van al die finaliste gevier, wie se toewyding, talent en passie die kompetisie ’n onvergeetlike viering van eg Namibiese geur en kulinêre tradisie gemaak het wat Namibiërs om die vuur, die braai en die tafel byeenbring.

Shoprite & Checkers het die Namibiese Sjefsvereniging, die beoordelaars en die borge, Coca-Cola, Tafel Lager en All Gold, bedank vir hul ondersteuning vir die kompetisie en ’n platform te skep wat Namibiese talent, koskultuur en gemeenskap vier.

Namibiërs sal binnekort self Kobus se wenresep kan geniet, met sy wenwors wat vanaf einde September 2026 by Shoprite & Checkers-winkels landswyd beskikbaar sal wees.

– [email protected]