Vuurwarm Mexikaanse NLU Agribraai om die draai

Altesaam 12 boereverenigings en sewe sosiale spanne gaan die naweek die vure hoog by die NLU Agribraai op Gobabis laat brand. Dit gaan brandrissiewarm wees met verlede jaar se braaikonings, Kalahari-Oos Boerevereniging, wat vanjaar se braaikompetisie met die Mexikaanse tema “Buenos Amigos” op 23 en 24 Mei gaan aanbied.“Vanjaar se doel is om jong boere aktief te ondersteun, aan te moedig en te motiveer. Jy, jong boer, jy is ons toekoms,” sê die organiseerders.Sit jou sombrero op en oefen solank die Mexikaanse golf en danspassies met Danie Prinsloo wat beide dae sal optree. Vermaak sal Vrydag deur die gewilde gaskunstenaars Willem Botha en Eloff verskaf word. Saterdagaand sal Appel en Wilma van Heerden die voete laat jeuk. Daar sal pret vir oud en jonk wees met talle stalletjies en lekker kos. Die Kokkedoor-deelnemer Borries Bornman sal Vrydag om 15:00 ’n beesrib-demonstrasie aanbied waar hy wys hoe ’n beesrib ontbeen en gebraai word. Mej. en Mnr. Boertjie sal om 16:00 gekroon word. Vir die baksters is daar ’n koekversierkompetisie wat Saterdag om 09:00 sal plaasvind. Willem Botha sal om 10:00 ’n grimeer-meestersklas in die kerksaal van die NG Moedergemeente aanbied. Die braaikoningspan van die 12 boereverenigings wat deelneem, gaan wegstap met meer as N$20 000 kontant en ander groot pryse. Boonop spog die wenner met die titel Namibiese braaikampioene 2025 en sal volgende jaar se kompetisie aanbied.Sake om die vuur sal uitgespook word tussen die boereverenigings van Leonardville, Witvlei, Omuramba, Koës, Abenab, Kalkfeld, Grünau, Sonop, Epikuro, Gobabis, Stampriet en Aranos.Die sewe sosiale spanne wat die tequila koud gaan hou, is Agrimark, die NLU Jongboerekomitee, Build It, Agra, Feedmaster, Taco Revolution en Biere.Vir die voorgereg moet braaiers ’n Mexikaanse taco op die vuur kan voorberei en boonop is daar ’n geheime bestanddeel ingesluit wat dikwels planne omvergooi.Vir die hoofgereg moet jy weet hoe om ’n beesrib te braai saam met rys, pampoen en ’n turksvyblaar as bykosse. Nagereg is ’n smullekker churro.’n Tentkamp is vir verblyf beskikbaar en besprekings kan steeds gemaak word. Toegang beloop N$100 per dag vir volwassenes of N$150 vir die naweek, N$70 per dag vir kinders tussen ses en 12 jaar oud of N$100 vir die naweek. Toegang vir kinders jonger as ses is gratis.Vir enige verdere navrae stuur ’n e-pos na nluagribraai2025@gmail.com of kontak Karin Swart by 081 222 8417 of Denise Human by 081 124 8995. – francoise@nmh.com.na

Vuurwarm Mexikaanse NLU Agribraai om die draai

Kommentaar

Republikein 2026-03-19

Meld asseblief aan om kommentaar te lewer

Vuurwarm Mexikaanse NLU Agribraai om die draai

Kommentaar

Republikein 2026-03-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.