Vroeë waarskuwings oor klimaat vir Kunene

Vroeë waarskuwingstelsels sal voortaan inwoners van die Kunenestreek waarsku as daar weer langdurige, uitgerekte droogtes kom en sal op dié manier beter beskerming bied. Die Omgewingsbeleggingsfonds van Namibië (EIF) en die ministerie van werke en vervoer het die afgelope Dinsdag ‘n samewerkingsooreenkoms onderteken, waarvolgens die streek nou van weerinstrumente soos geoutomatiseerde en nie-geoutomatiseerde reënmeters en outomatiese weerstasies voorsien sal word.Die uitvoerende hoof in die ministerie, me. Esther Kaapanda, het gesê die doel van die ooreenkoms is die ontwikkeling, onderhoud en toepassing van die vroeë waarskuwingstelsel binne die Irema Kunene-projek. Irema is die afkorting van ‘n projek getiteld “Improving Rangeland and Ecosystem Management Practices of Smallholder Farmers Under Conditions of Climate Change in Sesfontein, Fransfontein, and Warmquelle Areas.”Kaapanda het gesê die streek is die afgelope vier jaar swaar deur droogte getref, ‘n duidelike aanduiding dat boere by klimaatsverandering moet aanpas en veerkragtige boerderypraktyke toepas ter wille van beter volhoubaarheid. Sy sê die projek wat deur ‘n openbare-private-vennootskap gedryf word, sal die nadelige uitwerking van uiterste weertoestande in die streek kan verminder. “Die ministerie, deur sy meteorologiese dienste, speel ‘n fundamentele rol in die vroeë waarskuwingstelsel (EWS), as die beskermhere van klimaat- en weerinligting en kommunikasie. Daarom die betrokkenheid van dié ministerie in die projek, vir die nodige vaardighede en kapasiteit.Die insluiting van hierdie stasies sal die nasionale meteorologiese netwerk uitbrei en gevolglik die akkuraatheid van weervoorspellings in die Sesfontein-, Warmqulle-, Khowarib-, Fransfontein- en Kamanjab-gebied verbeter. Mnr. Benedict libanda, EIF se uitvoerende hoof, het tydens die geleentheid gesê dat Namibië oor die afgelope dekade ‘n toenemende intensiteit van klimaatrisiko’s ervaar het, wat ‘n negatiewe impak op die ontwikkeling van die land gehad het. libanda sê suksesvolle vroeë waarskuwingstelsels beskerms lewens, werksgeleenthede, ekostelsels en infrastruktuur en ondersteun langtermyn volhoubaarheid. “Inteendeel, vroeë waarskuwingstelsels kan ook bystand bied in beplanning, die spaar van geld oor die langtermyn en die beskerming van ekonomieë . . .”Hy het bygevoeg die EIF is besig om konsultasies af te handel vir die ontwikkeling van ‘n pasgemaakte vroeë waarskuwingstelsels vir die Kunenestreek teen ’n koste van N$950 000. Boonop is vier outomatiese weerstelsels teen N$800 000 aangekoop en gaan op plekke soos Warmquelle, Fransfontein, Kamanjab and Bergsig opgerig word. “Die Kunenestreek is een van die mees kwesbare streke in die land wat ernstig deur klimaatskokke geraak word, veral as dit by die afgelope uitgerekte, verwoestende droogtes kom. Dit het gelei tot die verliese van mense se lewensbestaan nadat groot veevrektes voorgekom het.” – elvira@republikein.com.na

Vroeë waarskuwings oor klimaat vir Kunene

Kommentaar

Republikein 2026-02-03

Meld asseblief aan om kommentaar te lewer

Vroeë waarskuwings oor klimaat vir Kunene

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.