Vleisverwerkingsaanleg van N$35 miljoen beplan

Die ministerie van landbou, water en grondhervorming sal binnekort ŉ vleisverwerkingsaanleg ter waarde van N$35 miljoen op Katima Mulilo naby die bestaande uitvoerslagpale bou.Die ministerie se uitvoerende direkteur, me. Ndiyakupi Nghituwamata, het gesê die konstruksie van die aanleg is een van die belangrikste projekte wat deur die Europese Unie (EU) se 11de Europese Ontwikkelingsfonds (EDF11) gefinansier sal word. Nghituwamata het die opmerkings die afgelope week gemaak terwyl sy die perseel besoek het waar die aanleg gebou sal word – ŉ gebied van sowat 5 ha.Dit kom kort nadat Meatco onlangs vir die eerste keer sedert onafhanklikwording 14 ton beesvleis vanaf die Katima Mulilo-abattoir (noord van die veterinêre kordonheining) na Ghana uitgevoer het.WAARDETOEVOEGINGNghituwamata het gesê buiten vir die konstruksie van die aanleg, sluit die finansiering ook die bou van die Katima Mulilo-kwarantyngeriewe en die opgradering van die Sachinga-ontwikkelingsentrum vir lewende hawe in. Laasgenoemde sal met satellietgeriewe vir kunsmatige inseminasie toegerus word. “Die Katima Mulilo-abattoir is ’n uitvoerabattoir, wat beteken ons kon onlangs rou vleis hiervandaan na ander lande uitvoer, sonder dat waarde toegevoeg is. “Met behulp van die vleisverwerkingsaanleg sal ons egter waarde tot die produkte kan byvoeg en terselfdertyd werk skep – beide deur die konstruksiefase, asook wanneer die aanleg operasioneel is,” het Nghituwamata gesê. ONDERSTEUNINGSPROGRAMDie Lewendehawe-ondersteuningsprogram (LSP) sal in agt noordelike kommunale gebiede (NCA’s) geïmplementeer word. Dit sluit die streke Kunene, Omusati, Oshana, Oshikoto, Ohangwena, Kavango-Wes, Kavango-Oos en Zambezi in.Die oorhoofse doel van die program is om entrepreneurskap te bevorder en die lewenstandaard van gemeenskappe, wat met vee in die NCA’s boer, op ŉ volhoubare wyse te verbeter. Dit moet ook die prestasie van die waardeketting vir lewende hawe in die NCA’s verbeter.Die EU finansier die EDF11-program deur ŉ programbegroting (PE) ter waarde van meer as N$284 miljoen. Die finansieringsooreenkoms vir die LSP-program is reeds in Junie 2017 onderteken, terwyl die PE in Augustus 2019 onderteken is, vir die implementering van die program se bedrywighede tot 14 April 2025. Die PE stem ooreen met die land se nasionale ontwikkelingsplan van die beesvleiswaardeketting in die NCA’s, soos in die Harambee-welvaartplan se afdeling vir landbou-ontwikkeling (HACCIADEP) uiteengesit.MANNHEIM KRY KOELKAMER Intussen het die Turkse Internasionale Samewerking- en Koördineringsagentskap (Tika) onlangs ook ’n verkoelingskamer aan die Mannheim-navorsingstasie by Tsumeb oorhandig. Die geriewe behoort ook aan die ministerie. Tika se nasionale koördineerder, mnr. Aydin Apaydin, het tydens die oorhandiging verduidelik die doel van die projek is om die navorsingstasie se geriewe vir die stoor van saad te verbeter. Dit moet help met die navorsingstasie se vermenigvuldiging van nuut-ontwikkelde saadvariëteite van koei-ertjies (Vigna unguiculata).“Die koelkamer sal help om saad te preserveer en te stoor, waar daar tans 40% van die saadproduksie by die stasie jaarliks vermors word. Dit sal help met die beskikbaarheid van saad vir verdere vermenigvuldiging van gesertifiseerde saad, wat dan na gewasverbouingsgebiede versprei kan word. “Soos ons almal weet, is saad ’n noodsaaklike voorvereiste vir landbouproduksie om sy potensiaal te kan bereik, terwyl die doeltreffendheid van ander landbou-insette daarvan afhanklik is. Ons weet ook dat saad ’n kritieke bron vir innovering in landbouproduktiwiteit is, veral vir kleinskaalse boere, wat beperkte hulpbronne het. “Beter saad kan landbouproduktiwiteit in droë lande soos Namibië ’n hupstoot gee,” het Apaydin gesê. – elvira@republikein.com.na

Vleisverwerkingsaanleg van N$35 miljoen beplan

Kommentaar

Republikein 2025-08-05

Meld asseblief aan om kommentaar te lewer

Vleisverwerkingsaanleg van N$35 miljoen beplan

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie