Verskerp biosekuriteit op jag- en wildplase

Met bek-en-klouseer (BKS) wat ’n ernstige bedreiging vir Namibië se vee- en wildsektore bly, het die direktoraat veeartsenydienste (DVS) in die ministerie van landbou, visserye, water en grondhervorming biosekuriteitsriglyne uitgereik wat spesifiek op jag- en wildplase gemik is. Hierdie sektor is besonder kwesbaar weens die voortdurende beweging van mense, voertuie en diere.BKS is ’n hoogs aansteeklike virussiekte wat alle diere met gesplete hoewe aantas. Dit sluit in beeste, skape, bokke, varke, buffels, vlakvarke en wild soos koedoes, elande, rooibokke en springbokke. Tekens om na op te let is koors, blase in die bek en op die hoewe, oormatige speeksel, mankheid en ’n daling in produksie. ’n Uitbreking van BKS kan wildgetalle beïnvloed, jag- en toerismbedrywighede ontwrig en Namibië se aansien as wildbestemming benadeel, lui die jongste nuusbrief van die Namibië Landbou-unie (NLU).BEHEER BEWEGING VAN MENSE, VOERTUIE“Kliënte, personeel en verskaffers besoek gereeld jag- en wildplase en elkeen dra ’n potensiële biosekuriteitsrisiko,” sê die NLU.Plaaswerkers moet spesifieke klere en skoene gebruik en dit ná besoeke aan ander plase ontsmet.Hulle moet ook ’n kwarantyntydperk nakom indien hulle in kontak met geraakte gebiede of diere was. Toegang moet tot noodsaaklike personeel beperk word, met ’n besoekregister by die hek. Jaggaste moet reeds voor aankoms oor biosekuriteitsprosedures ingelig word.Alle voertuie moet van diere weggehou word en bande en onderstelle moet ontsmet wees voordat toegang tot sensitiewe gebiede verkry word. Beeslorries moet bevestiging van ontsmetting verskaf voordat toegang verleen word.ONTSMETTING, VOER, WATER EN OMHEININGDoeltreffende ontsmettingsmiddels vir wildplase sluit in natriumhipochloriet (’n huishoudelike bleikmiddel, gemeng 3:2 met water), Virkon S teen 1%, sitroensuur, natriumkarbonaat en natriumhidroksied – elk geskik vir spesifieke oppervlaktes en toepassings. Ontsmettingsmiddel moet te alle tye beskikbaar wees en personeel moet verstaan hoe en wanneer om dit te gebruik.Voer moet van betroubare verskaffers bekom word, waterpunte moet skoon en onbesmet gehou word en gedeelde waterpunte tussen aangrensende plase moet vermy word. Omheinings moet onderhou word om kontak tussen wild en vee of rondloperdiere te voorkom. Nuut aangekoopte diere moet vir ’n minimum van 30 dae gekwarantyn word, met daaglikse monitering vir tekens van siekte.REKORDHOUDING, RAPPORTERINGBoere moet van alle besoekerbewegings en hul vorige bestemmings, diere-aankope, dierebeweging tussen kampe en voertuigbewegings op die eiendom rekord hou. Goeie rekords stel veeartsenyowerhede in staat om die spoor van die siekte vinnig na te gaan indien ’n uitbreking vermoed word.Enige vermoedelike geval van BKS moet sonder versuim by die naaste staatsveeartskantoor aangemeld word. “Vroeë rapportering beskerm wild, aangrensende plase en Namibië se breër vee- en wildbedryf,” benadruk die NLU. Kontakbesonderhede vir staatsveeartskantore in alle streke is beskikbaar by fmdsupportfund.com.– NLU

Verskerp biosekuriteit op jag- en wildplase

Kommentaar

Republikein 2026-07-22

Meld asseblief aan om kommentaar te lewer

Verskerp biosekuriteit op jag- en wildplase

Kommentaar

Republikein 2026-07-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.