Stoorplanne vir verwagte rekordmielie-oes

Die Namibië Akkerbouraad (NAB) het strategiese tydelike bergingsoplossings gekry om die enorme verwagte toename in witmielieproduksie te bestuur. Dié proaktiewe maatreëls verseker dat die bedryf die verwagte rekord-opbrengste doeltreffend kan akkommodeer, volgens Loide Uahengo, bestuurder vir akkerbou-ontwikkeling by die NAB.Namibië verwag ’n oorvloedige oes van witmielies vir die bemarkingseisoen van 2026, wat op 111 447 ton geraam word, het Uahengo bevestig. Dit verteenwoordig ’n toename van 61% in vergelyking met die 69 282 ton wat in 2025 geoes is. Hierdie oes sal na verwagting ongeveer 60% van die jaarlikse vraag na witmielies in Namibië dek, wat beteken dat slegs 40% gedurende hierdie jaar ingevoer sal word.Die verwagte groei in volumes word grootliks aan die uitbreiding van hektare onder besproeiing toegeskryf, aangesien 69% van die verwagte oes uit besproeiingsproduksie sal kom en slegs 31% uit droëland, het sy verduidelik. Uahengo het bygevoeg dat die grootste deel van die mielies na verwagting van Mei tot Augustus 2026 geoes en bemark sal word.Die verwagte oes sal nie dadelik deur meulenaars aangekoop word nie, aangesien die plaaslike koers om te maal na verwagting tot ongeveer 12 000 ton per maand sal verlangsaam weens goeie oeste van mededingende produkte soos mahangu en beperkte regeringstenders, wat die bemarkingseisoen tot ongeveer nege maande verleng. Daarom is daar ’n behoefte aan tydelike graanberging, aangesien die beskikbare bergingsgeriewe by meulens nie voldoende is nie en meulenaars groot hoeveelhede kontant benodig om die oes in ’n kort tydperk te koop.Daarom het Uahengo bevestig dat die NAB belangegroepe in die graanbedryf betrek het tydens ’n onlangse vergadering vandeesmaand om die behoefte aan tydelike graanberging vir die bemarkingseisoen van 2026 te bespreek.TYDELIKE BERGINGBy die vergadering het die graanbedryf ooreengekom dat bergingsgeriewe wat op plase en meulens beskikbaar is, gebruik moet word om graan tydelik te stoor terwyl daar op ’n koper gewag word, het Uahengo verduidelik. Daar is ook bepaal dat die mielies van die Zambezi-produksiegebied deur meulenaars in die streek aangekoop sal word en daar is voldoende bergingsgeriewe op Katima Mulilo vir die verwagte oes van ongeveer 6 000 ton.Die mielies van die suidelike produksiesone (ongeveer 12 826 ton) sal tydelik by die silo’s van die Hardap-koöperasie gestoor word vir aflewering in Windhoek, terwyl die mielies van die sentrale produksiesone (ongeveer 23 829 ton) ook aan meulenaars in Windhoek afgelewer sal word.Laastens het Uahengo aangedui dat die mielies van die Mieliedriehoek (ongeveer 42 840 ton) meestal in Otavi afgelewer sal word, waar tydelike graanberging deur meulenaars teen ’n koste beskikbaar sal wees, met die opsie van silosakke wat oorweeg word. Die mielies van die Kavangostreke en noordelike sentrale produksiesones (ongeveer 26 000 ton) sal tydelik op plase gestoor word terwyl dit geleidelik aan die meulenaars en die nasionale strategiese voedselreserwe onder die Landboubemarkings- en Handelsagentskap (Amta) afgelewer word.Om die probleem van graanberging in die toekoms te takel, het Uahengo afgesluit dat die NAB beplan om kommersiële graanbergingsgeriewe te bou wat as bemarkingsgeriewe gebruik sal word. Dié geriewe sal gemik wees op die hoofproduksiegebiede met ’n totale kapasiteit van 30 000 tot 40 000 ton. Dit sal, indien goedgekeur word, gedurende die finansiële jare van 2026-’27 en 2027-’28 geïmplementeer word.– jacques@nmh-hub.com.na

Stoorplanne vir verwagte rekordmielie-oes

Kommentaar

Republikein 2026-04-29

Meld asseblief aan om kommentaar te lewer

Stoorplanne vir verwagte rekordmielie-oes

Kommentaar

Republikein 2026-04-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.