Speenkalfwaardeketting onder erge druk

Alhoewel Suid-Afrika ’n belangrike mark vir speenkalwers sal bly, word verwag dat plaaslike markmededinging in Namibië sal toeneem en na verwagting sal speenkalfuitvoere na Suid-Afrika op die lang termyn afneem.“Die realiteit is dat Namibiese speenkalfprodusente, soos hul Suid-Afrikaanse eweknieë, onder geweldige finansiële druk verkeer.”Volgens die Namibië Landbou-unie (NLU) kan Namibië slegs sowat 30% van sy vleisproduksie self verbruik, en is dus afhanklik van beide streek- en internasionale uitvoermarkte.Volgens ’n Rooivleisbedryfverslag, opgestel deur die Buro vir Voedsel- en Landboubeleid (BFAP) en deur die Rooivleisbedryfdienste vrygestel, is ongeveer 2,8 miljoen beeste verlede jaar in Suid-Afrika geslag. Volgens beraming deur die Lewendehaweprodusente-organisasie (LPO) is ongeveer 180 000 beeste op die hoef vanaf Namibië na Suid-Afrika in 2024 uitgevoer – ’n jaar gekenmerk deur noodbemarking en verdere kudde-uitdunning. Dit verteenwoordig ongeveer 6,4% van die beeste wat in Suid-Afrika geslag is.“Tussen 2022 en 2024 het Suid-Afrika ’n totaal van 7,85 miljoen beeste geslag, terwyl Namibië oor dieselfde tydperk ’n totaal van 468 000 beeste op die hoef uitgevoer het, wat 5,9% van die totale verslagting in Suid-Afrika uitmaak,” het die NLU gesê.“Ten spyte daarvan dat Namibiese speenkalfuitvoere net ongeveer 6% beloop van die totale beeste wat in Suid-Afrika geslag word, is daar aan die begin van 2025 opnuut emosionele bewerings gemaak dat die invoer van speenkalwers uit Namibië bydra tot die lae speenkalfpryse in Suid-Afrika.”HOë INSETKOSTEDie NLU beklemtoon dat Namibiese speenkalfprodusente, soos hul Suid-Afrikaanse eweknieë, onder geweldige finansiële druk verkeer: “Volgens produksiekoste-ontledings wat deur die LPO gedoen is, is speenkalfproduksie in 2023 en 2024 teen ’n verlies bedryf, as die koste van grond, belasting en bestuur in ag geneem word.” Volgens die LPO is die hoofrede hiervoor insetkoste wat met 61% sedert 2017 gestyg het, hoofsaaklik as gevolg van internasionale konflikte, terwyl die speenkalfprys in dieselfde tydperk met 23% gedaal het. “Gevolglik is produsente genoodsaak om alternatiewe inkomstebronne te soek of hul eie teelkuddes te snoei om te kan oorleef.”Volgens die LPO is die winsdrywers van ’n ekstensiewe primêre vleisprodusent nog steeds die bestokking per hektaar, die doeltreffendheid van die omskakeling van gras na vleis, prys per kilogram en koste per hektaar. “Die LPO is deurlopend in gesprek met sy eweknieë in Suid-Afrika en Botswana om wedersydse begrip te verseker en sake van gemeenskaplike belang aan te pak.”VIER UITVOERABATTOIRS IN 2026Die NLU benadruk Namibië fokus op die uitvoer van vleis na internasionale markte en vier beesvleis-uitvoerabattoirs sal in 2026 operasioneel wees. “Alhoewel Suid-Afrika steeds ’n belangrike mark vir speenkalwers sal bly, word verwag dat plaaslike markmededinging sal toeneem en speenkalfuitvoere na Suid-Afrika oor die lang termyn sal afneem.“Die speenkalfwaardeketting is dus onder enorme druk oraloor Suider-Afrika. Almal wag op die herstel van die verbruiker se bestedingsvermoë, waarna ’n pryssprong in speenkalfpryse verwag kan word," voorspel die NLU. – republikein@republikein.com.na

Speenkalfwaardeketting onder erge druk

Kommentaar

Republikein 2025-11-03

Meld asseblief aan om kommentaar te lewer

Speenkalfwaardeketting onder erge druk

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.