Protokol vir uitvoer van skaap-, bokvleis na China

Namibië en China het ’n ooreenkoms onderteken met betrekking tot die protokol wat gevolg moet word vir die uitvoer van skaap- en bokvleis uit Namibië.

Die ministerie van landbou, visserye, water en grondhervorming en die algemene administrasie van doeane van China (GACC) oor die inspeksie-, kwarantyn- en higiëniese vereistes van skaap- en bokvleis wat van Namibië na China uitgevoer sal word, het verlede week die protokolooreenkoms onderteken.

Die nuutaangestelde minister Inge Zaamwani-Kamwi het tydens die geleentheid gesê die twee lande onderhandel sedert verlede jaar oor verwante ooreenkomste wat fokus op inisiatiewe vir vennootskappe wat val onder landbou en lewensbestaan.

Volgens haar het die ministerie en GACC in dié verband begin met protokolle vir vereistes vir inspeksies, kwarantyn en higiëne vir skaap- en bokvleis wat na China uitgevoer sal word.

“My wens is dat dié protokolle sowel as die ooreenkoms op die gebied van kwarantyn en plantbeskerming verskeie positiewe ekonomiese gevolge vir beide lande sal inhou en wat onder meer sal lei tot voordele soos werkskepping, positiewe ekonomiese ontwikkeling en veral ’n wen-wen-situasie vir almal,” het sy gesê.



LPO

Intussen beplan die Lewendehaweprodusente-organisasie (LPO) twee streekvergaderings om lede op hoogte te bring van die vordering van ’n studie wat daarop gemik is om Namibiese skaapboere se betrokkenheid by die internasionale lamuitvoerwaardeketting te versterk.

Namibië se skaapbedryf, wat tradisioneel staatmaak op die uitvoer van lewende skape na Suid-Afrika, poog om sy markte uit te brei.

Tydens ’n LPO-streekkongres in Oktober 2024 is die organisasie deur sy lede opdrag gegee om ’n sakeplan vir skaapboere te ontwikkel om verder by die internasionale lamuitvoerwaardeketting betrokke te raak.

Skaapboere in die suide vergader op 19 Mei in Mariental en op 20 Mei op Keetmanshoop.

– [email protected]