Ongemerkte beeste terug noord van die Oranje
Geen optrede van veeartsenydienste
Ondanks ‘n groot inligtingsveldtog oor die voorkoming van bek-en-klouseer (BKS) in Namibië in September, is ongemerkte beeste en bokke begin Oktober terug aan die Namibiese kant met owerhede wat weer traag reageer.
Die bekende wildveearts, voormalige staatsveearts en internasionaal bekroonde omgewingslegende, dr. Pete Morkel, het op navraag van Republikein bevestig dat die beeste en bokke terug is op sy plaas Kambreek 104 wat langs die Oranjerivier geleë is.
Op 12 Oktober het hy ‘n e-pos gestuur aan verskeie owerhede, onder meer beamptes van die die direktoraat van veeartsenydienste (DVS) in die ministerie van landbou, visserye, water en grondhervorming - die staatsveearts van Karasburg, dr. Arnold de Klerk ingesluit, asook die Namibië Landbou-unie (NLU) om hulle in te lig dat die beeste en bokke terug is nadat dit op 11 Oktober gesien is.
“My seun Benoit en ons werknemer, Matias Matjayi, het na daardie deel van Kambreek 104 gestap wat aangrensend is aan die Oranjerivier. Naby die Bassons se kamp op Kambreek, het hulle 22 volwasse beeste gevind. Toe het hulle gesien hoe nog vyf van die Bassons se beeste uit 'n kraal vrygelaat word waarin daar nege kalwers was,” lui die e-pos.
“Een van die veewagters genaamd Sidney het vir Benoit gesê daar is nog 15 beeste 'n bietjie verder wes. Benoit en Mathias het ook sowat 100 bokke op eilande naby gesien en sowat 30 lammers in een van die krale.”
Morkel sê behalwe vir twee van die beeste wat oorplaatjies gehad het (maar nie die regulasie NamLITS-tipe nie), was al die volwasse beeste en bokke sonder oorplaatjies en die beeste was ook nie gebrandmerk nie.
Hy sê die rivier is tans laag en dit is maklik vir die beeste en bokke om na die eilande en oor na die suidelike oewer te beweeg en hulle het gereeld kontak met Suid-Afrikaanse vee.
Verlede Dinsdag het De Klerk ‘n WhatsApp-boodskap aan Morkel gestuur en hom bedank vir die inligting. Hulle het telefonies gesels en “De Klerk het vir my gesê hulle gaan iets doen en reageer,” het Morkel gesê
Republikein het verlede Dinsdag ‘n e-pos aan De Klerk gestuur en gevra of wanneer hy die gebied gaan besoek weens die erns van die kwessie van BKS. Oproepe aan De Klerk sedert verlede week en gister het onbeantwoord gebly en WhatsApp-boodskappe aan hom is nie gelees nie.
Gister het Morkel bevestig dat geen veeartsenybeampte die gebied nog kom besoek het nie.
“Ek vind dit onbegryplik dat 'n maand na DVS se "FMD Awareness Roadshow" in Karasburg op 8 September, wat alles gehandel het oor die verbetering van maatreëls om te verhoed dat FMD die suide van Namibië binnedring, en waar senior DVS-veeartsenykundiges van Windhoek dit duidelik gemaak het dat: ’Namibië se dieregesondheidsregulasies word afgedwing van waar die water die oewer aan die noordekant van die Oranjerivier raak’, niks verander het nie.
“Die boodskap wat ek by die roadshow gekry het, was dat daar streng afdwinging van Namibië se dieregesondheidsregulasies sou wees om ons suidelike grens ondeurdringbaar vir FMD te maak. Dit gebeur duidelik nie,” meen Morkel.
Hy het sy teleurstelling oor die gebrek aan reaksie van DVS oor die kwessie uitgespreek: “As ek sien hoe pateties DVS vir jare was, beteken hul idee van aksie dat iets waarskynlik in ses maande gaan gebeur."
Die hofsaak oor ‘n 15 jaar lange grondbesettingskwessie tussen Morkel en Willem Basson duur vandag in die hoërhof in Windhoek voort. Die regsgeding tussen Morkel en die Basson-familie duur al vyf jaar lank voort.
SMOKKELNES
Op 1 September het die Namibiese polisie (Nampol) een verdagte by die sogenaamde besettingskamp langs die Oranjerivier in hegtenis geneem, asook ’n daggaplant en ammunisie gevind. Die beskuldigde,
Abraham Matheus (29), het op 3 September in die Karasburg-landdroshof op ’n klag van die onwettige besit van ’n daggaplant verskyn en is op borgtog van N$500 vrygelaat.
Toe is 350 ongemerkte bokke (waarvan 150 jong bokke was), agt kalwers en sewe ongemerkte beeste ook by die Basson-kamp naby die rivier op Morkel se eiendomme Pelgrimsrust 100 en Kambreek 104 gevind, "almal ongemerk, ongeregistreerd en met ’n onbekende siektestatus”, volgens Morkel. Die vee is intussen verwyder, maar het nou weer opgeduik.
Vermoedens bestaan dat die suidelike grensgebied 'n smokkelnes is van vee, dwelms en perlemoen, asook mensehandel.
Drie vermeende perlemoensmokkelaars van Warmbad, Laurentius Basson (glo familie van Willem Basson), Petrus Alexander Bock en Mannetjie Harold Schultz, sal ook weer einde Oktober in die Karasburg-landdroshof verskyn nadat hulle glo perlemoen ter waarde van sowat N$1,7 miljoen oor die Oranjerivier gesmokkel het.
Die beskuldigdes word onder meer daarvan aangekla dat hulle in Julie 2022 Chinese burgers gehelp het om 407 kg perlemoen oor die Oranjerivier te smokkel. Hulle staan ook tereg op aanklagte van ontvoering en die oortreding van die wet op die voorkoming van georganiseerde misdaad (Poca). Die twee Chinese burgers is toe in hegtenis geneem en met geen stempels in hul paspoort as onwettig in die land verklaar, aangekla en gedeporteer.
NOORDOEWER-GRENSPOS
Aan die westelike kant heers daar ook kommer oor oorgrensmisdaad en die poreuse grens weens die lae Oranjerivier "met groot stukke rivier wat oop en droog is. . . enigiemand kan sonder moeite heen en weer loop tussen Oranjemund en Alexanderbaai" in die Noord-Kaap.
Sakelui in landboukringe wat gereeld tussen Suid-Afrika en Namibië reis, het verlede week by Republikein gekla oor hoe "ongeskik" Namibiese immigrasiebeamptes by die Noordoewer-grenspos met hulle was.
"Ons moes nou ’n paar keer deur die Noordoewer-grenspos gaan vir besigheid. Dit is vreeslik aan die Namibiese kant, sjoe! Hulle is pleinweg ongeskik met almal. Duitse toeriste wou omdraai, want niemand het hulle gehelp nie. Wat gaan aan daar?" is gevra.
"Die hele grens en grenspos is 'n klug. Die mense se houding by die grenspos is absoluut ongeskik en dit het niks met smokkel of bek-en-klou te doen nie."
- [email protected]
Die bekende wildveearts, voormalige staatsveearts en internasionaal bekroonde omgewingslegende, dr. Pete Morkel, het op navraag van Republikein bevestig dat die beeste en bokke terug is op sy plaas Kambreek 104 wat langs die Oranjerivier geleë is.
Op 12 Oktober het hy ‘n e-pos gestuur aan verskeie owerhede, onder meer beamptes van die die direktoraat van veeartsenydienste (DVS) in die ministerie van landbou, visserye, water en grondhervorming - die staatsveearts van Karasburg, dr. Arnold de Klerk ingesluit, asook die Namibië Landbou-unie (NLU) om hulle in te lig dat die beeste en bokke terug is nadat dit op 11 Oktober gesien is.
“My seun Benoit en ons werknemer, Matias Matjayi, het na daardie deel van Kambreek 104 gestap wat aangrensend is aan die Oranjerivier. Naby die Bassons se kamp op Kambreek, het hulle 22 volwasse beeste gevind. Toe het hulle gesien hoe nog vyf van die Bassons se beeste uit 'n kraal vrygelaat word waarin daar nege kalwers was,” lui die e-pos.
“Een van die veewagters genaamd Sidney het vir Benoit gesê daar is nog 15 beeste 'n bietjie verder wes. Benoit en Mathias het ook sowat 100 bokke op eilande naby gesien en sowat 30 lammers in een van die krale.”
Morkel sê behalwe vir twee van die beeste wat oorplaatjies gehad het (maar nie die regulasie NamLITS-tipe nie), was al die volwasse beeste en bokke sonder oorplaatjies en die beeste was ook nie gebrandmerk nie.
Hy sê die rivier is tans laag en dit is maklik vir die beeste en bokke om na die eilande en oor na die suidelike oewer te beweeg en hulle het gereeld kontak met Suid-Afrikaanse vee.
Verlede Dinsdag het De Klerk ‘n WhatsApp-boodskap aan Morkel gestuur en hom bedank vir die inligting. Hulle het telefonies gesels en “De Klerk het vir my gesê hulle gaan iets doen en reageer,” het Morkel gesê
Republikein het verlede Dinsdag ‘n e-pos aan De Klerk gestuur en gevra of wanneer hy die gebied gaan besoek weens die erns van die kwessie van BKS. Oproepe aan De Klerk sedert verlede week en gister het onbeantwoord gebly en WhatsApp-boodskappe aan hom is nie gelees nie.
Gister het Morkel bevestig dat geen veeartsenybeampte die gebied nog kom besoek het nie.
“Ek vind dit onbegryplik dat 'n maand na DVS se "FMD Awareness Roadshow" in Karasburg op 8 September, wat alles gehandel het oor die verbetering van maatreëls om te verhoed dat FMD die suide van Namibië binnedring, en waar senior DVS-veeartsenykundiges van Windhoek dit duidelik gemaak het dat: ’Namibië se dieregesondheidsregulasies word afgedwing van waar die water die oewer aan die noordekant van die Oranjerivier raak’, niks verander het nie.
“Die boodskap wat ek by die roadshow gekry het, was dat daar streng afdwinging van Namibië se dieregesondheidsregulasies sou wees om ons suidelike grens ondeurdringbaar vir FMD te maak. Dit gebeur duidelik nie,” meen Morkel.
Hy het sy teleurstelling oor die gebrek aan reaksie van DVS oor die kwessie uitgespreek: “As ek sien hoe pateties DVS vir jare was, beteken hul idee van aksie dat iets waarskynlik in ses maande gaan gebeur."
Die hofsaak oor ‘n 15 jaar lange grondbesettingskwessie tussen Morkel en Willem Basson duur vandag in die hoërhof in Windhoek voort. Die regsgeding tussen Morkel en die Basson-familie duur al vyf jaar lank voort.
SMOKKELNES
Op 1 September het die Namibiese polisie (Nampol) een verdagte by die sogenaamde besettingskamp langs die Oranjerivier in hegtenis geneem, asook ’n daggaplant en ammunisie gevind. Die beskuldigde,
Abraham Matheus (29), het op 3 September in die Karasburg-landdroshof op ’n klag van die onwettige besit van ’n daggaplant verskyn en is op borgtog van N$500 vrygelaat.
Toe is 350 ongemerkte bokke (waarvan 150 jong bokke was), agt kalwers en sewe ongemerkte beeste ook by die Basson-kamp naby die rivier op Morkel se eiendomme Pelgrimsrust 100 en Kambreek 104 gevind, "almal ongemerk, ongeregistreerd en met ’n onbekende siektestatus”, volgens Morkel. Die vee is intussen verwyder, maar het nou weer opgeduik.
Vermoedens bestaan dat die suidelike grensgebied 'n smokkelnes is van vee, dwelms en perlemoen, asook mensehandel.
Drie vermeende perlemoensmokkelaars van Warmbad, Laurentius Basson (glo familie van Willem Basson), Petrus Alexander Bock en Mannetjie Harold Schultz, sal ook weer einde Oktober in die Karasburg-landdroshof verskyn nadat hulle glo perlemoen ter waarde van sowat N$1,7 miljoen oor die Oranjerivier gesmokkel het.
Die beskuldigdes word onder meer daarvan aangekla dat hulle in Julie 2022 Chinese burgers gehelp het om 407 kg perlemoen oor die Oranjerivier te smokkel. Hulle staan ook tereg op aanklagte van ontvoering en die oortreding van die wet op die voorkoming van georganiseerde misdaad (Poca). Die twee Chinese burgers is toe in hegtenis geneem en met geen stempels in hul paspoort as onwettig in die land verklaar, aangekla en gedeporteer.
NOORDOEWER-GRENSPOS
Aan die westelike kant heers daar ook kommer oor oorgrensmisdaad en die poreuse grens weens die lae Oranjerivier "met groot stukke rivier wat oop en droog is. . . enigiemand kan sonder moeite heen en weer loop tussen Oranjemund en Alexanderbaai" in die Noord-Kaap.
Sakelui in landboukringe wat gereeld tussen Suid-Afrika en Namibië reis, het verlede week by Republikein gekla oor hoe "ongeskik" Namibiese immigrasiebeamptes by die Noordoewer-grenspos met hulle was.
"Ons moes nou ’n paar keer deur die Noordoewer-grenspos gaan vir besigheid. Dit is vreeslik aan die Namibiese kant, sjoe! Hulle is pleinweg ongeskik met almal. Duitse toeriste wou omdraai, want niemand het hulle gehelp nie. Wat gaan aan daar?" is gevra.
"Die hele grens en grenspos is 'n klug. Die mense se houding by die grenspos is absoluut ongeskik en dit het niks met smokkel of bek-en-klou te doen nie."
- [email protected]
Kommentaar
Republikein
Geen kommentaar is op hierdie artikel gelaat nie