Namibië se BKS het impak op Suid-Afrika

NuusredaksieVerteenwoordigers van die Namibië Landbou-unie (NLU), die Lewendehaweprodusente-organisasie (LPO) en die Lewendehawe- en Lewendehaweprodukteraad van Namibië (LLPBN) het verlede week samesprekings met die Suid-Afrikaanse Rooivleisprodusente-organisasie (RPO) saam met AgriSA oor die uitbreking van bek-en-klouseer (BKS) in Namibië gevoer.Dr. Frikkie Maré, hoof-uitvoerende bestuurder van die RPO, het Maandag in ’n mediaverklaring Namibië sterkte toegewens.“As Suid-Afrikaners is ons deeglik bewus van die vernietigende gevolge van BKS, en wil ons graag vir Namibië sterkte toewens met die pad vorentoe. “Hierdie virus het die potensiaal om meer mense ekonomies keelaf te sny as wat dit diere sal laat vrek en dus is dit bykans belangriker om vir marktoegang en die voortbestaan van produsente in die waardeketting te veg as wat dit is om die virus self te veg,” het Maré gesê.Hy het ook die impak op die buurland bespreek en beskou dit nie as ’n geïsoleerde probleem nie. Suid-Afrika het reeds skerp spronge in beide die lamkarkas-en speenkalfpryse gesien, die twee kommoditeite wat die buurland die meeste uit Namibië invoer. “Daar is gerugte dat speenkalwers teen tussen R57/kg en R60/kg op die veilings verkoop, terwyl die A2-lamkarkasprys in sekere areas met sowat R9/kg week-op-week gespring het. “Plaaslik juig baie produsente oor die skielike hoë pryse, maar die vraag is: Hoe volhoubaar is die tendens en is die huidige prysspronge die gevolg van ’n markskok of van ’n ware tekort weens die grens wat toe is?,” vra hy.“Gegewe die syfers is die skerp styging in die speenkalfprys wat ons gesien het, eerder ’n skokreaksie as ’n marktekort, aangesien ons hierdie jaar tot op datum maar sowat 2% van ons totale slagtings as speenkalwers uit Namibië ingevoer het.”Maré sê die scenario van lammers lyk egter anders: Volgens die jaar-tot-datum-syfer het die invoere van slaglammers ongeveer 15% van ons totale slagtings uitgemaak. “In hierdie geval kan die opskorting van invoere dus wel ’n tekort teweeggebring het en dit is belangrik om te besef dat die tekort veral gevoel word by sommige abattoirs waarvan die kapasiteit oor baie jare ontwikkel is om die Namibiese lammers te slag. “By sommige Suid-Afrikaanse abattoirs maak die Namibiese invoere meer as 70% van die totale slagsyfer uit. Met die invoere wat gestaak is, is die mededinging vir slagbare lammers dus groot om die besighede aan die gang te hou en word die pryse skerp opgedryf,” het hy gesê. Maré meen dit is egter nie ’n volhoubare situasie nie, aangesien die tekort nie uit plaaslike lammers aangevul kan word nie en die deurvloei te laag gaan bly om die abattoirs lewensvatbaar te hou.Die BKS-uitbreking in Namibië hou ongelukkig ook vir Suid-Afrika wesenlike gevare in, wat Maré soos volg opgesom het:- Suid-Afrikaanse skaapabattoirs wat deurvloei verloor en uiteindelik sal moet sluit, sodat Suid-Afrikaanse produsente hul naaste slagplek verloor.- Daar is tans nie ’n ander mark vir die Namibiese skape nie en hierdie diere bou dus net op in Namibië. Hoe langer die grens toe bly, hoe groter gaan die invloei van skape wees wanneer die grens weer oopmaak, met die gevolg dat ons pryse dan weer wesenlik gaan daal (’n afwaartse prysskok is dikwels groter as ’n opwaartse een).- Aangesien Suid-Afrika nog altyd die grootste gedeelte van die Namibiese skaapaanteel ingevoer het, hou die toekomstige oopmaak van die grens nie soveel gevaar vir die skaapbedryf as vir die beesbedryf in nie. “Namibië het tans nie ’n mark vir hulle beesvleis nie en indien daar onder Sacu [Suider-Afrikaanse Doeane-unie] se vrye handelsooreenkoms toegelaat word dat bykans al hulle beesvleis en/of speenkalwers vrylik na Suid-Afrika verskeep word, gaan dit ’n groot negatiewe impak op ons beessektor hê,” verduidelik Maré. “Die invloei van beeste en/of beesvleis sal dus baie noukeurig beplan moet word.”Die invoersyfers vir speenkalwers en slagbare (vet) lammers van die afgelope drie jaar verskyn in die tabel hieronder.

Namibië se BKS het impak op Suid-Afrika

Kommentaar

Republikein 2026-10-15

Meld asseblief aan om kommentaar te lewer

Namibië se BKS het impak op Suid-Afrika

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.