N$11 miljoen in 10 minute

Beloftes van skenkings van N$11 miljoen uit die private sektor is binne tien minute gemaak om bek-en-klouseer (BKS) met hand en tand te beveg.  

“Ons is amper soos ’n eiland binne die SADC-streek. Ons is die enigste land wat nog ’n BKS-vrye status sonder inenting het en ons wil dit beskerm,” het die minister van landbou, visserye, water en grondhervorming, Inge Zaamwani, gesê

Sy het gister in Windhoek die nasionale BKS-taakspan en ’n toegewyde ondersteuningsfonds amptelik van stapel gestuur. 

Die inisiatief het ten doel om die land se uiters waardevolle status van “BKS-vry sonder inenting” te beveilig.

Sleutelbydraers sluit in die Namibië Landbou-unie (NLU), wat N$3 miljoen in natura belowe het deur salarisse, statutêre koste en bedryfsuitgawes, asook Bank Windhoek, First Rand (FNB), die DAS Group, Feedmaster, Namib Mills, Agrimark en Agra.

Hierdie mobilisering kom terwyl Namibië hom in terme van dieregesondheid geïsoleer bevind, omring deur BKS-uitbrekings in buurlande. 

Zaamwani het verduidelik hoewel die kabinet reeds N$57,5 miljoen vir onmiddellike BKS-voorkoming goedgekeur het, die totale belegging wat nodig is om die veesektor op die lang termyn volledig te beveilig, op N$1,5 miljard beraam word en die onmiddellike behoefte op sowat N$120 miljoen. 

TAAKSPAN SE MANDAAT

Die nuutgestigte taakspan, saamgestel uit kundiges van die landbouministerie, die Universiteit van Namibië (Unam) en verskeie boere-unies, is belas met die koördinering van spoedige reaksies. 

As die “eerste verdedigingslinie” sal die span fokus op vroeë opsporing en die handhawing van die integriteit van die suidelike en oostelike grense om die langtermyn-mededingendheid van Namibiese beesvleis op internasionale uitvoermarkte te verseker.

Benewens toesig sal die taakspan die logistiek van bioveiligheid bestuur en verseker dat die fondse na hoërisiko-toegangspunte vloei. 

Dit sluit in:

- Verskerpte grenspatrollies: Die ontplooiing van bykomende personeel en hulpbronne om dierebeweging oor hoërisiko-grense te monitor.

- Versterking van infrastruktuur: Die herstel en instandhouding van veterinêre kordonheinings om kontak met besmette buffels of rondlopervee uit buurlande te voorkom.

- Tegniese monitering: Die implementering van gevorderde moniteringstelsels om intydse data oor moontlike uitbrekings te verskaf.

- Bedryfskoördinering: Om as ’n brug tussen die regering en rolspelers in die private sektor soos Meatco en die Lewendehawe- en Lewendehaweprodukteraad van Namibië (LLPBN) op te tree om ’n eenvormige reaksie op enige bedreiging te verseker.

– [email protected]