Minimumstandaarde kom vir akkerbouers

Die Namibiese Akkerbouraad (NAB) is besig om verskeie minimumvereistes vir gehalte en voedselveiligheid in die tuinbou- en gewasproduksie uit te rol, waaraan produsente gehoor sal moet gee.Dit is veral belangrik waar daar vir uitvoermarkte geproduseer word, het dr. Fidelis Mwazi, uitvoerende hoof van die NAB, Woensdag tydens Bank Windhoek se aanlyn reeks vir landboupraatjies verduidelik. “Verskillende markte het verskillende standaarde en vereistes waaraan jy moet voldoen voor jy daarheen kan uitvoer,” het hy verder verduidelik. Hy meen die uitrol van die plaaslike vereistes help Namibiese produsente om reeds hul voetwerk reg te kry, sodat die nodige markte betree kan word. Mwazi het gesê die NAB het reeds verskeie minimumstandaarde vir gehalte en voedselveiligheid in die verskeie uitvoerbedrywe soos tafeldruiwe-, tamatie- en aartappelproduksie ontwikkel en is besig om dit na meer produksielyne uit te brei. “Tans word mense ook opgelei, wat op die beurt opleiding aan produsente sal verskaf oor hoe om hierdie minimumstandaarde na te kom. Die NAB is ook belas met die taak om inspeksies te doen en seker te maak daar word gehoor gegee aan die nodige vereistes,” het hy verduidelik.STANDAARDEEden Greenfields se tuinboukundige, mnr. Charles Mambadzo, het verduidelik dat verskillende standaarde geld, afhangende of jy na internasionale of meer plaaslike markte wil uitvoer. Hy is een van diegene wat opleiding by die NAB oor die minimumvereistes ontvang het en voorts ander produsente daarmee sal help.“Internasionale beste landboupraktyke (internasionale G.A.P) verwys na ŉ stel standaarde wat internasionaal as beste praktyk erken word, terwyl daar ook nog ŉ stel standaarde vir plaaslike en streekmarkte is.”Hy het verduidelik dat die voordeel van die toepassing van die standaarde insluit dat jy marktoegang kan kry, gehoor kan gee aan wetgewing vir voedselveiligheid en risiko’s, handelaars en verbruikers groter vertroue in jou produk kan hê en dat jou produkte naspoorbaar is, volgens ŉ internasionale of plaaslike G.A.P-nommer. Verder help dit ook dat plase doeltreffend bestuur word asook gehaltebestuur. Hy het gewys dat daar vier vlakke van sertifisering is, waarvan die eerste vir toetreders is en die laaste vir produsente wat produkte wil uitvoer. Tweede is die sogenaamde fondasievlak en derde ŉ tussengangersvlak. Mambadzo het verduidelik ŉ handelaar of mark kan ook vereistes stel van op watter vlak produsente moet wees voor hul produksie aanvaar sal word.As dit by registrasies kom, kan produsente as individue of groepe registreer, tesame met die gehaltebestuurstelsel waarvan hulle gebruik wil maak. ASSESSERINGMambadzo sê tans, vir plaaslike produksie, is huidige G.A.P-vereistes dat jy by die Akkerbouraad as ŉ produsent moet registreer, waarna ŉ inspekteur na jou gestuur sal word om seker te maak jy gee gehoor aan die nodige NAB-standaarde. Indien jy aan die standaarde voldoen, sal jy ŉ brief van nakoming ontvang, wat vir 12 maande geldig is. Dan ontvang jy ŉ plaaslike G.A.P-nommer. Die proses is gratis.Mambadzo sê tans het Namibië 12 geregistreerde opleiers, wat ook op die globale G.A.P-webwerf beskikbaar is. “Ons gaan binnekort uitgaan na verskeie streke en opleiding bied om produsente bewus te maak van hierdie standaarde,” het hy gesê. Produsente kan die NAB se afdeling vir standaarde en gehaltebeheer vir meer inligting kontak, of direk in verbinding met Mambadzo tree deur 081 836 6748 te skakel of ŉ e-pos na charles@edengreenfields.com te stuur. – elvira@republikein.com.na

Minimumstandaarde kom vir akkerbouers

Kommentaar

Republikein 2026-06-12

Meld asseblief aan om kommentaar te lewer

Minimumstandaarde kom vir akkerbouers

Kommentaar

Republikein 2026-06-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.