‘Likwidasieproses, duidelikheid oor AgriBusDev-poste verbind’

Voormalige werknemers van die Landbousake-ontwikkelingsagentskap (AgriBusDev) is steeds onseker oor hul diensstatus terwyl die ontbinding van dié staatsbeheerde landboumaatskappy voortduur. 

Volgens die ministerie van landbou, visserye, water en grondhervorming is die relevante regs- en administratiewe prosesse steeds aan die gang.

In reaksie op navrae van Republikein verlede week, het die ministerie se woordvoerder, Romeo Muyunda, gesê aangeleenthede wat met kontrakte verband hou, insluitend formele kommunikasie met werknemers, val binne die regs- en administratiewe prosesse wat die ontbinding van AgriBusDev beheer.

Die verduideliking kom te midde van kommer onder werkers by sewe voormalige groenskemaprojekte. Hulle beweer hulle het geen ontslagbriewe of enige amptelike kommunikasie ontvang wat hul diensstatus of toekoms verduidelik het, nadat die maatskappy op 30 Junie vanjaar sy bedrywighede gestaak het nie.

Muyunda het gesê AgriBusDev het sy eie bestuursstrukture, en bestuur- en werkgewerverantwoordelikhede.

“Die ministerie erken die onsekerheid wat die betrokke werknemers ervaar en wil hulle verseker dat daar aandag aan die relevante prosesse in ooreenstemming met toepaslike wette en gevestigde prosedures gegee word,” het hy gesê.

Muyunda het bygevoeg die geraakte werknemers sal formeel deur die toepaslike kanale in kennis gestel word sodra die nodige administratiewe en regsprosesse afgehandel is.

IN LIMBO

AgriBusDev het voorheen die regering se groenskemaprojekte bestuur, voordat die kabinet besluit het die bestuur en administrasie van die projekte moet weer na die ministerie oorgedra word.

Muyunda het bevestig die ministerie het reeds verantwoordelikheid geneem vir die bestuur en operasionele toesig van die groenskemaprojekte om die kontinuïteit van landbouproduksie te verseker en nasionale doelwitte vir voedselsekerheid te beskerm.

Ten spyte van die oorname van die bestuur van die projekte, het die ministerie egter nie bevestig of voormalige AgriBusDev-werknemers in die ministerie of ’n ander regeringsentiteit opgeneem sal word nie.

“Enige besluite rakende personeelreëlings sal deur die toepaslike arbeidswetgewing, die wetgewende raamwerk vir die staatsdiens en regeringsriglyne gelei word. Sodra hierdie prosesse gefinaliseer is, sal die betrokke werknemers formeel in kennis gestel word,” het Muyunda gesê.

DEURLOPEND

Oor die ontbinding van AgriBusDev, het hy gesê die proses is aan die gang en vorder deur die vereiste wetlike, administratiewe en bestuursprosedures.

Muyunda het gesê uitstaande aangeleenthede wat met indiensneming verband hou, insluitend enige voordele wat aan werknemers verskuldig is, word hanteer deur middel van die toepaslike wetlike en administratiewe prosesse wat met die likwidasie van die entiteit gepaardgaan.

“Die ministerie werk nou saam met die betrokke belanghebbendes om te verseker dat hierdie aangeleenthede in ooreenstemming met alle toepaslike wetgewing opgelos word,” het hy gesê.

Hoewel die ministerie gesê het dat hy daartoe verbind bly om sekerheid aan geraakte werknemers te bied, het Muyunda aangedui dat geen definitiewe tydlyn tans verskaf kan word vir wanneer die uitstaande aangeleenthede afgehandel sal word nie. – [email protected]