Kakie is koning op NLU Agribraai

Die gewilde Namibië Landbou-unie (NLU) Agribraai word vanjaar op 14 en 15 Oktober deur die Uhlenhorst Boerevereniging by die Mariental Skougronde aangebied. Die geleentheid moes vir twee jaar weens die Covid-19-pandemie uitgestel word. Die boerevereniging sê hulle hoop om hierdie jaar weer die “ou dae gevoel” van die Agribraai terug te bring: “Die dae toe ons as kinders onder die tafels aan die slaap geraak het, die dae wat braaispanne soos een groot groep saamgetrek en die gees kom skep het, die dae wat &#039;n biertent tot in die oggendure gees gedra het en die dae waar ons oormoeg maar met &#039;n nuwe lewenslus huis toe gery het en uitgesien het na die volgende jaar se fees.”Dienooreenkomstig is besluit dat vanjaar se tema “Kakie is koning” sal wees. “Ons wil die uniekheid van eenvoud vier en dit op &#039;n manier doen wat bewys dat kakie nie net op die plaas hoort nie, maar ook vir ŉ groot makietie kan sorg.BRAAISPANNEBraaispanne kan reeds op die webtuiste www.nluagribraai.com inskryf. Spanne moet uit drie lede bestaan, maar spanne se ondersteuners mag saamkuier in en om die stalletjie. Boereverenigings kan gratis inskryf, terwyl die koste N$1 000 beloop vir sosiale spanne om in te skryf. Intussen het die organiseerders ook gesê daar word aan ŉ nuwe stel reëls gewerk om die kompetisie eenvoudiger en prettiger te maak. Terwyl die bestanddele vir die voorgereg ‘n verrassing gaan wees, word bestanddele soos springbokrug, Top Score-mieliemeel, patats en tamaties vir die hoofgereg voorsien. Die bestanddele vir die nagereg is Bakpro-witbrood, kondensmelk en Namibiese dadels. Spanne kan reeds Vrydag hul stalletjies oprig, maar sal op Saterdag 15 Oktober vanaf 06:00 in die hooftent bymekaarkom om die reëls, produkte en tydskedule vir beoordeling te ontvang, met die beoordeling wat vanaf 11:00 sal plaasvind. Die beste braaiers sal omstreeks 17:30 die aand tydens ŉ prysuitdeling aangewys word. VERMAAKKunstenaars soos Wicus van der Merwe en Adam Tas sal op Vrydag en Saterdag vir die vermaak sorg. Intussen is daar ook ŉ kompetisie aangekondig, waar iemand ŉ kans kan staan om Willem Botha se model vir sy grimeringsmeesterklas te wees, wat op 14 Oktober by die braai aangebied gaan word. Meer inligting hieroor kan op die NLU Agribraai se Facebook-blad gevind word. Kaartjies vir die geleentheid is by www.nluagribraai.com/wb beskikbaar. Uitstallers kan reeds hul plekke bespreek, terwyl diegene wat nog verblyf wil bespreek, moet spring aangesien sommige plekke reeds volbespreek is.Toegang is N$150 per volwassene en N$70 vir kinders – wat hul toegang tot die speelpark vir die hele naweek insluit. Navrae kan aan Hoekus van Niekerk by 081 294 4676 of Corrine van Wyk by 081 358 2299 gerig word of ‘n e-pos kan na agribraai@gmail.com gestuur word. – elvira@republikein.com.na

Kakie is koning op NLU Agribraai

Kommentaar

Republikein 2026-05-05

Meld asseblief aan om kommentaar te lewer

Kakie is koning op NLU Agribraai

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.