Invoer van beessemen uit SA hervat

Die Direktoraat Veeartsenydienste (DVS) het verlede week aangekondig dat die invoer- en deurgangsbeweging van beessemen uit Suid-Afrika hervat word. Volgens die Namibië Landbou-unie (NLU) is hierdie aankondiging ’n positiewe stap vorentoe, aangesien die invoer van beessemen vir ’n geruime tyd opgeskort was. “Terwyl die heropening van die invoer van beessemen ’n belangrike geleentheid bied om plaaslike teelprogramme en genetiese diversiteit te verbeter, is dit belangrik om daarop te let dat daar steeds ’n opskorting is op die invoer van lewende diere uit Suid-Afrika vir genetiese doeleindes,” sê die NLU.Mecki Schneider, bekende Brahmanstoetteler van die plaas Okamutombe in die Grootfontein-distrik, het aan Network Media Hub gesê hierdie stap word verwelkom “aangesien nuwe teelmateriaal belangrik is om genetiese vordering te verseker. Kunsmatige inseminasie (KI) is een tegnologie om dit te bewerkstellig”.Landboukenner en tegniese adviseur van Feedmaster Namibia, Christo van Zyl, het beaam dit bied ’n geleentheid om weer van die kleiner rasse en selfs groter rasse se grondslagbasis op genetika te verbeter.Hy sê as hy by bulveilings gaan kyk na die stamboeke van bulle, dan sien jy baie die gebruik van genetika het reeds tussen plaaslike telers plaasgevind.“Met die gevolg is dat ons in ’n situasie sit van die kleiner rasse spesifiek wat begin het om ’n bottelnekeffek te vorm met persentasies in telings wat opgegaan het na 3%, 8% en 12%, wat nog binne die genetiese konteks nog aanvaarbaar is. “Gegewe die lang termyn, as ons reeds by 12% is, raak dit egter ’n kopseer. Ek dink hier gaan ’n deur oop,” het Van Zyl gesê. Vir hom is daar belangrike aspekte wat in ag geneem moet word, naamlik die verantwoordelikheid om dit deur die regte kanale en op die regte maniere te doen, gegewe dat daar die nodige toetsing en protokolle in plek is voor saad vrygestel word. “Telers en genootskappe moet ook verantwoordelikheid neem om te sê ons bring nie ’n probleemeienskap sommer net in soos voorheen by sekere rasse nie. Daar was voorheen probleme met sommige rasse dat ons amper ongewenste eienskappe ingebring het,” het Van Zyl verduidelik. “Dit moet verantwoordelik en goed gekoördineer word deur die stoetveevereniging wat ’n sterker rol moet speel. “Ons moet ons status in die buiteland reg hou sonder die druk van sekere groepe wat ons uitvoerstatus en die land se status kan beïnvloed.” Hy voeg by Namibië het veeartse in die land wat spesialiste raak in KI wat semen doeltreffend kan gebruik. Van Zyl meen daar is ’n groot behoefte vir genetika vir rasse soos onder meer Limousines, Herefords, Thuli’s, Charolais, Droughtmasters, Santa Gertrudas en Dexters wat redelik geneties noustrop getrek het omdat die variasiepoel beperk was.– francoise@nmh.com.na

Invoer van beessemen uit SA hervat

Kommentaar

Republikein 2025-10-31

Meld asseblief aan om kommentaar te lewer

Invoer van beessemen uit SA hervat

Kommentaar

Republikein 2025-10-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.