‘Die toekoms lyk vir my baie donker’

“Die dood het hier in die ǁKharasstreek aan ons deure kom klop,” sê ’n boer op ’n hervestigingsplaas, sowat 14 kilometer buite Karasburg.Dit gaan nie goed nie, erken die 68-jarige Veronica Mouton ná die bevestiging van ’n uitbreking van bek-en-klouseer (BKS) op ’n plaas in die streek en die daaropvolgende instelling van maatreëls om die verspreiding van dié siekte te stuit.Mouton, ’n afgetrede verpleegkundige, maan “ons moet ernstig bid dat die situasie weer normaal word”. Sy boer sedert 1991 met bokke (270), skape (120) en beeste (23) op Obub 8, ’n hervestigingsplaas langs die Aroab-pad wat sy ná haar pa se dood oorgeneem het. Mouton het twee werkers in diens.Die aankondiging dat BKS in die land en in haar omgewing uitgebreek het, het haar in ’n toestand van totale skok gelaat, erken sy. “Dis soos ’n plaag wat ons net voor Desember getref het. Dit is ’n groot probleem en die toekoms lyk vir my baie donker. “Hierdie is die tyd wanneer kerke en gesinne funksies hou en ons vee koop. Ons sal vir die volgende drie maande afgesny wees en niks hê om van te leef nie. Wat doen ek nou?” het sy gevra.Volgens Mouton hang baie mense se lewensbestaan van die beeste op plase af. “Ons slag die diere en verkoop die karkasse, of ons neem hulle na ’n veiling. Sommige van ons is heeltemal van ons vee afhanklik en het geen ander inkomste nie. “Ek is op die punt om tou op te gooi. Ek is ’n alleenlopende vrou en weet nie wat om te doen nie,” het sy gesê.Volgens Mouton het sy opgemerk sommige van haar bokke het loopneuse gehad.“Ek staan al die afgelope paar jaar onder voortdurende finansiële druk en kon nie ’n weidingsaanvulling vir my hele trop klein lammers voorsien nie. “Ons het twee van die bokke wat gevrek het, oopgesny en gevind dat hul breine en lewers ’n blouerige kleur gehad het,” het sy gesê.Mouton het erken dat sy in haglike omstandighede verkeer. “Ek het geen ander manier om ’n inkomste te genereer om die plaas aan die gang te hou nie. Dit is nie net die diere wat ons moet voer nie; daar is ook die mense en ander verpligtinge. “Ek moet betaal vir water en herstelwerk aan die kampe. Om dit alles te doen, verg geld,” het Mouton gesê.Sy het gesê sy is verstom oor hoe diere in ǁKharas met BKS besmet geraak het.“Ons het ons gebied en diere vir jare lank suksesvol vry van bek-en-klouseer gehou. Hoe het dit gebeur? Ek kan dit nie begryp nie en wil graag weet, want ons boere word geag om ons diere dop te hou en bewus van hul toestand te wees. “Ons weet ons moet enige abnormaliteite aanmeld sodra ons dit opmerk, sodat daar aandag aan gegee kan word. Ons moet net waaksaam bly,” het Mouton gesê.Sy beplan om die staatsveearts vir leiding te nader en verwag dat die regering die geraakte boere sal bystaan.“Ek het soveel vrae. Sal ons hulp kry, en hoe? Medisyne wat voorgeskryf word om die verspreiding van bek-en-klouseer te voorkom en ons kuddes te behandel, moet vir ons diere voorsien word. “Ons moet nie aan ons eie lot oorgelaat word nie. Ons het nie geld nie, want ons mag niks verkoop nie. My bankrekening is leeg,” het sy gesê.Mouton het gesê die enigste manier waarop sy geld kon verdien om voer en medisyne te koop, was deur diere te verkoop.“Ons is onder inperking en sit nou net hier; ons hande is afgekap. Ons kan niks verkoop nie en daar is so baie van ons wat dieselfde lot deel. “In die verlede het ons diere verkoop om medisyne te koop, die diere te voer, die werkers te betaal en kop bo water te hou. Maar nou sal dit nie meer moontlik wees nie,” het sy gesê.Volgens Mouton raak die beperkings ook haar twee werkers. “Ek het voorheen ’n dier geslag en die vleis in porsies gedeel wat ek onder ons verdeel het. Met die huidige regulasies word daar nie meer geslag nie. “Die vleis wat in die vrieskas oor is, kan nog geëet word, maar daarna sal daar niks meer wees om te voorsien nie. Wat gaan ons eet? “Ek het my bes gedoen om ’n minimum inkomste en iets om te eet te voorsien. Wat moet ek nou doen?” het Mouton gevra. – otis@nmh-hub.com.na

‘Die toekoms lyk vir my baie donker’

Kommentaar

Republikein 2026-09-29

Meld asseblief aan om kommentaar te lewer

‘Die toekoms lyk vir my baie donker’

Kommentaar

Republikein 2026-09-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.