Chinese maatskappy gaan (dalk) kordonheining in Suide oprig

Sonja Smith en Nikanor Nangolo’n Gesamentlike onderneming met bande met China is gekies vir die toekenning van ’n veeartsenykundige grensheiningprojek van N$126,3 miljoen in die ||Kharasstreek. Die verkrygingsproses het nog nie die finale toekenningsfase bereik nie.Die Sentrale Verkrygingsraad van Namibië (CPBN) het op 18 Augustus 2026 ’n kennisgewing van keuring vir die verkrygingstoekenning uitgereik. Dit het China Jiangxi International (Namibia) (Pty) Ltd JV Homefin Properties CC as die suksesvolle tenderaar vir die konstruksie van ’n veeartsenykundige kordonheining van 185 kilometer langs Namibië se grens met Suid-Afrika aangewys. Die projek beslaan 155 kilometer langs die Oranjerivier en ’n verdere 30 kilometer tussen die Klein Menasse- en Mata Mata-grensposte.Die kennisgewing stel die kontrakprys op N$126,3 miljoen, insluitend BTW, met ’n kontrakduur van vier maande.Die CPBN se woordvoerder Johanna Kambala het in ’n onderhoud met Republikein bevestig die tender het op 14 Julie 2026 gesluit en die evalueringsproses is afgehandel. Volgens Kambala is die kennisgewing gevolglik op 18 Augustus volgens wetgewing uitgereik, maar hy het egter beklemtoon dat die kennisgewing nie ’n finale toekenning is nie.Sy het gesê onsuksesvolle tenderaars het tot 31 Augustus 2026 om aansoek te doen vir heroorweging, indien hulle ontevrede is met die uitslag van die evalueringsproses.Volgens haar bly die verkrygingsproses onderhewig aan die statutêre heroorwegingstydperk. Stappe om die toekenning te finaliseer, gaan eers na die verstryking van die tydperk, onderhewig aan enige aansoeke wat ontvang word, voort.Die tydperk vir heroorweging het op 20 Augustus om 08:00 begin en eindig op 31 Augustus 2026 om 17:00. Indien ’n onsuksesvolle tenderaar binne die tydperk nie ’n aansoek vir heroorweging indien nie, sal die rekeningkundige beampte of voorsitter van die verkrygingsraad ingevolge wetgewing die kontrak aan China Jiangxi International (Namibia) (Pty) Ltd JV Homefin Properties CC toeken. ’n Tenderaar wat ’n heroorwegingsaansoek indien, sal binne 14 werksdae na die tydperk in kennis gestel word. Die CPBN-kennisgewing meld uitdruklik dat die keuringskennisgewing “nie ’n aanvaarding” van die suksesvolle bieër se tender is nie en ook nie suksesvolle toekenning is nie. Die verslag van die tenderevalueringskomitee (BEC) gedateer 18 Augustus wat deur Republikein gesien is, het China Jiangxi International (Namibia) (Pty) Ltd JV Homefin Properties CC eerste vir die kontrak bo twee alternatiewe tenderaars geplaas.Die tender is aanvanklik op ongeveer N$123 miljoen gewaardeer. China Jiangxi/Homefin het ’n gewysigde tender van N$126 miljoen ingedien, terwyl die geëvalueerde prys tot sowat N$120 miljoen verlaag is. Dit is na die toepassing van ’n voorkeurmarge, wat die gesamentlike onderneming eerste in die finale evalueringsranglys geplaas het.Puanchu International Construction Engineering (Pty) Ltd JV Southern Africa Projects was tweede met sy tender van N$122 miljoen. Landmark Projects (Pty) Ltd JV Transact Investments CC was in die derde plek, nadat die gewysigde tender van N$131 miljoen na N$125 miljoen aangepas is.Volgens die evalueringsverslag het die BEC die tenderaars volgens die pryse van die laagste tot die hoogste met inagneming van die voorkeurmarge gerangskik. Die sal vervolgens aan die laagste geëvalueerde tender ingevolge Artikel 55 (1) van die verkrygingswet toegeken word. Die tender wat deur die ministerie van landbou, visserye, water en grondhervorming uitgereik en op 22 Junie gepubliseer is, het op 14 Julie gesluit. ’n Totaal van 23 maatskappye het elk ’n tender ingedien, met 11 tenderaars wat tydens die finansiële evalueringsfase as geskik beskou is. Rekords van die CPBN wys Homefin Properties CC en China Jiangxi International (Namibia) het voorheen saamgewerk as ’n gesamentlike onderneming aan wie in Februarie 2024 ’n NamWater-kontrak van N$91 miljoen toegeken is. Die kontrak was vir die konstruksie en vervanging van die waterpyplyn tussen Ondangwa en Omutsegwonime en bykomende werke.In sy jaarverslag vir 2023-’24 het die CPBN die vennootskap se nasionaliteit as ’n “Namibiese JV buitelandse entiteit” geklassifiseer.Die NamWater-projek het in Mei 2024 begin en sou na verwagting in Mei 2025 voltooi wees. Volgens ’n moniteringsverslag gedateer 30 Junie 2025 wat deur Republikein gesien is, het die projek toe ’n gemiddelde voltooiingskoers van 60% bereik. Dit teenoor ’n verwagte 112% gebaseer op verstreke tyd.Volgens die CPBN se verslag was die kontrakeur toe twee maande agter skedule. Verdere CPBN-rekords dui aan dat die maatskappy aan verskeie ander tenders vir regerings- en openbare entiteite deelgeneem het.Dit sluit ’n tender van N$129 miljoen in een tender in waar dit agtste onder die tenderaars was wat aan die tenderkriteria voldoen het. Twee afsonderlike tenderrekords wys Homefin het tenders van onderskeidelik N$106 miljoen en N$59 miljoen ingedien.PLAASLIKE DEELNAME’n Plaaslike kontrakteur wat naamloos wou bly, het gevra dat die tender gekanselleer en weer geadverteer moet word. Die rede was dat die projek vir Namibiese maatskappye gereserveer moet word.Die bron wou ook weet waarom ’n Chinese-gekoppelde maatskappy oorweeg moet word vir wat hy as ’n eenvoudige konstruksieprojek beskryf het.“Sê jy dat ons in Namibië, in die hele land, nie die kapasiteit het om ’n eenvoudige heining op te rig nie? Namibiërs het heinings op plase, om ons huise en oral elders opgerig,” het die kontrakteur gesê.Volgens hom ondermyn die toekenning van die hele projek aan een buitelandse maatskappy plaaslike besighede en geleenthede vir Namibiese kontrakteurs. “Julle wil hê ’n Chinese maatskappy moet ’n heining vir ons bou. Hoekom? Dis ’n eenvoudige ding. Dis ’n baie eenvoudige werk,” het die kontrakteur gesê.Sy voorstel was dat die projek tussen verskeie Namibiese maatskappye verdeel word om plaaslike deelname te verbreed.“Die 150 kilometer moet ten minste tussen tien Namibiese maatskappye verdeel word sodat ons meer Namibiërs langs die grens het,” het hy gesê.“Hoekom moet julle 155 km aan een Chinese maatskappy onder een maatskappynaam gee? Die beste manier is om elke maatskappy ten minste 10 km te gee. Op dié manier kan meer Namibiese maatskappye baat vind en meer Namibiërs in diens geneem word,” het hy gesê. Die regering het verlede maand die bekendstelling van ’n heiningstrategie van N$1,5 miljard in die ||Kharasstreek aangekondig om Namibië se bek-en-klouseervrye status te versterk midde die uitbreking van die siekte in buurlande.Die landbouminister Inge Zaamwani, het gesê die projek is daarop gemik om beheermaatreëls teen bek-en-klouseer (BKS) te verskerp, buffersones te skep en Namibië se winsgewende beesvleisuitvoere te beskerm.Namibië bly sonder inenting BKS-vry en behou sy internasionale uitvoerstatus na markte na onder meer die Europese Unie (EU) en China.“Hierdie en voorheen geïmplementeerde beheermaatreëls het die land in staat gestel om sy status as BKS-vryesone te handhaaf,” het Zaamwani gesê. – sonja@nmh-hub.com.na– nikanor@nmh-hub.com.na

Chinese maatskappy gaan (dalk) kordonheining in Suide oprig

Kommentaar

Republikein 2026-10-21

Meld asseblief aan om kommentaar te lewer

Chinese maatskappy gaan (dalk) kordonheining in Suide oprig

Kommentaar

Republikein 2026-10-21

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.