Boere, besoekers moet BKS-biosekuriteit toepas

Die Namibië Landbou-unie (NLU) sê daar heers tans onsekerheid oor hoe jagters wat Namibië binnekom ten opsigte van biosekuriteit en bek-en-klouseer (BKS)-risiko’s hanteer moet word.

“In die Staatskoerant is ’n tyd gelede afgekondig dat jagters wat in die kontrolegebied kom jag, eers vir drie dae in ’n fasiliteit weg van die plaas waar hulle gaan jag, moet isoleer. Die doel hiervan is om die risiko van ’n moontlike meganiese BKS-virusoordrag te beperk,” lui die jongste nuusbrief van die NLU.

Die NLU se aanbeveling is dat jagters nie uitgesonder kan word nie, maar dat alle besoekers aan Namibië as ’n potensiële biosekuriteitsrisiko beskou moet word. 

Ná gesprekvoering tussen die NLU en die direktoraat veeartsenydienste (DVS) in die ministerie van landbou, visserye, water en grondhervorming is bevestig dat jagters dus nie verplig sal word om elders by ’n fasiliteit te isoleer voordat hulle ’n betrokke jagplaas besoek nie.

Alhoewel daar geen amptelike isolasievereiste afgedwing word nie, beteken dit egter nie dat die beginsel van “isolasie” nie steeds belangrik is nie, volgens die NLU. 

“DVS voel baie sterk daaroor dat alle besoekers, insluitend jagters, die verantwoordelikheid het om eers te ‘isoleer’ en direkte kontak met vee te vermy.

“Hoewel fisiese isolasie by ’n afsonderlike fasiliteit dus nie afgedwing word nie, bly die beginsel van isolasie en verantwoordelike gedrag steeds ’n kritieke deel van biosekuriteit,” lui die nuusbrief.

Die NLU meen daar moet daarom sterk klem geplaas word op verantwoordelike optrede deur beide die gasheer (boer) en besoekers op ’n plaas. 

“Jagters en ander besoekers moet ernstig bewus gemaak word van die belangrikheid van biosekuriteit en hul samewerking hierin moet aktief verkry word.

“Die verantwoordelikheid rus dus op die plaaslike gasheer om te verseker dat streng biosekuriteitsmaatreëls toegepas word.”

Dit sluit onder meer in:

• Die ontsmetting van voertuie, skoene en toerusting;

• Die verantwoordelike bestuur van besoekers se bewegings op plase; en

• Die vermyding van toegang tot vee, veekampe en hanteringsgeriewe.

– NLU