BKS: Verslapte maatreëls

Die ministerie van landbou, visserye, water en grondhervorming deur sy direktoraat van veeartsenykundige dienste (DVS) het gistermiddag die gedeeltelike opheffing van die aanvanklike beperkings en maatreëls op bek-en-klouseer (BKS) aangekondig. 

Volgens die hoofstaatsveaarts, dr. Kenneth Shoombe, is die beperkings op die beweging van gespletehoefdiere en hul produkte met onmiddellike effek in gebiede Noord van die veterinêre kordonheining (sogenaamde Rooilyn) opgehef.

“Die protokolle met betrekking tot die beweging van kommoditeite (soos gaar vleis, gepasteuriseerde melk en botter van Noord na Suid van die veterinêre kordonheining sal hervat word onderhewig aan die Wet op Dieregesondheid No. van 2011. C,” het hy gister in ’n veeartsenykundige kennisgewing gesê. 

“Die beweging van gespletehoefdiere en hul produkte (vleis, vel, ongepasteuriseerde melk en botter, insluitend kraalmis) na Noord van die veeartsenykundige kordonheining is steeds onder beperkings.

Vir gebiede Suid van die Rooilyn, die ||Kharasstreek uitgesluit, word die beperking op die beweging van die volgende produkte opgehef: 

- Rou vleis tans in berging by geregistreerde geriewe soos slagpale, slagterye, in koue berging, onder die ministeries van landbou, visserye, water en grondhervorming; gesondheid en maatskaplike dienste en stedelike en landelike ontwikkeling. Dokumentasie van die oorsprong van sodanige vleis en vleisprodukte moet as bewys dien.

- Vleis wat van kleinhandelaars en slagterye gekoop word, mits bewys van aankope voorgelê word. 

- Gebaalde gras, lusern, strooi, voer, hooi, kuilvoer en oesreste, behalwe vir die ||Kharasstreek. 

Bepalings vir die slag van diere binne die gebiede Suid van die Rooilyn, die ||Kharasstreek uitgesluit, geld vir:

- Diere wat in ’n geregistreerde onderneming met goedgekeurde biosekuriteitsmaatreëls in voerkrale en kwarantynstasies gestaan ​​het wat goedgekeur is deur veeartsenybeamptes wie se retrospektiewe opsporing onder die Namibië Lewendehawe-opsporingstelsel toon dat daar die afgelope 30 dae geen nuwe diere ingebring is nie, word toegelaat om na die slagpale te skuif vir direkte slagting onder ’n veeartsenykundige permit ná kliniese ondersoek en negatiewe BKS-resultate. 

- Die slagting van vee by geregistreerde slagpale word toegelaat, mits die diere vir 30 dae voor slagting geïsoleer is en negatief teen bek-en-klouseer getoets is. 

- Die slagting vir eie tuisverbruik word toegelaat op voorwaarde dat die vleis en vleisprodukte nie vanaf die slagperseel verskuif of vervoer word nie. 

- Die slagting op die plaas of by die plaasopstal vir verkoopdoeleindes is tot verdere kennisgewing verbode. 

Wat die beweging van verwerkte diereprodukte landswyd betref, word die beweging en handel van die volgende verwerkte diereprodukte toegelaat: Gaar verwerkte vleisprodukte, gepasteuriseerde melk en sy produkte, asook velle verwerk tot natblou.

Padblokkades was sedert die naweek landswyd opgerig waar voertuie vir gespletehoefdiere en rou diereprodukte deursoek word en kapanastalletjies is toegemaak.

Rondom Karasburg in die ||Kharasstreek, die episentrum van die uitbreking van BKS, is verskeie padblokkades opgerig.  

Drie mans is in afsonderlike voorvalle in hegtenis geneem nadat hulle tydens ’n stop-en-deursoek-operasie by een van die padblokkades met skaapkarkasse betrap is.

Hulle staan ​​tereg op aanklagte ingevolge die wet op dieregesondheid.

Enigiemand wat skuldig bevind word aan ’n oortreding ingevolge die wet, kan ’n boete van N$100 000 dollar of vyf jaar tronkstraf, of albei, in die gesig staar.

Adjunkkommissaris Godfriedt Kauhanda, hoof van operasies in die ||Kharasstreek, het beklemtoon: “Dit is ’n nasionale ramp; ons wil nie kanse waag nie. Ons doen ’n ernstige beroep op almal om ons te help om hierdie uitbreking hok te slaan.”

Tot dusver het altesaam 17 van die 199 monsters wat tydens verskerpte toesig vir BKS in Namibië ingesamel is, positief getoets. Al die positiewe gevalle is tot dusver tot die Karasburg-distrik in die ǁKharasstreek beperk.

Die jongste uitslae volg op die bevestiging van BKS op 23 September nadat 10 van 11 monsters wat van ’n trop van 65 beeste op ’n kommersiële plaas in die Karasburg-distrik geneem is, positief getoets het.

Die 65 beeste op die geraakte plaas, asook diere op omliggende plase, bly onder streng monitering, het die minister in die Namibiese presidensie en waarnemende minister van landbou, Charles Mubita, Saterdag tydens ’n mediakonferensie by Staatshuis bevestig.

Tydens opvolgondersoeke wat ná die aanvanklike positiewe uitslae gedoen is, is  vier beeste geïdentifiseer wat van die geraakte plaas in Karasburg na Otjiwarongo in die Otjozondjupastreek verskuif is. 

Die vier diere was onder 30 beeste wat op 24 September getoets is. Die oorblywende 26 diere is uit voorsorg getoets en was nie aan die geraakte plaas gekoppel nie.

Geen vrae van die media is tydens die mediakonferensie toegelaat nie. 

Sedert die aankondiging van bek-en-klouseer in die land, is vleis en suiwelprodukte van die winkelrakke opgeraap en toeriste wou weet met watter vleis- en suiwelprodukte hulle deur die land mag reis. 

Kapana-verkopers by Windhoek se Enkelkwartiere het hul kommer uitgespreek oor die swak opkoms van kliënte Vrydag.

Fransisco Fiaa (29), wat al vier jaar lank kapana verkoop, het aan Desmarius Hansen gesê die afname in kliënte kan hul bestaan bedreig wat van daaglikse kapana-verkope afhanklik is, maar die maatreëls bly staan tot die inkubasietydperk verby is.

Op Grootfontein waar beeste in die dorp rondloop, word vandag om 15:00 ’n vergadering met vee-eienaars by die munisipaliteit gehou.  

“Alle eienaars word versoek om hul diere onder behoorlike beheer te hou en te verhoed dat hulle vrylik in die dorp of in die omliggende gebiede rondloop,” lui ’n kennisgewing van die Grootfontein-munisipaliteit. 

“Hierdie vergadering is ’n geleentheid om belangrike inligting te deel, vrae te beantwoord, te verduidelik wat van vee-eienaars verwag word en ooreen te kom oor praktiese stappe om veebeheer te verbeter ter beskerming van dieregesondheid, openbare gesondheid, inwoners en die boerderygemeenskap as geheel.”

– [email protected]