BKS: EU gereed vir gesprek

Die Europese Unie (EU) is gereed om met die Namibiese regering en veeartsenykundige owerhede oor die pad vorentoe te beraadslaag ná die onlangse uitbreking van bek-en-klouseer (BKS) in die land. Dié versekering is deur die EU se ambassadeur in Namibië, Ana Beatriz Martins, gegee, met die waarde van die land se mark vir beesvleis na Europa wat sowat N$3,3 miljard beloop. Volgens haar is die EU van die BKS-uitbreking in Namibië in kennis gestel. Sy het namens die EU lof uitgespreek teenoor die Namibiese owerhede se vinnige, deursigtige en professionele optrede. Martins het gesê die EU se gesondheids- en voedselveiligheidsdienste evalueer die situasie en enige maatreëls wat nodig is om die gesondheid van diere en burgers binne die unie te beskerm. “BKS is hoogs aansteeklik en kan ernstige gevolge vir lewende hawe, boere se bestaan en die breër ekonomie inhou. Ons staan gereed om met die Namibiese regering en veeartsenykundige owerhede in gesprek te tree,” het sy gister aan Republikein gesê.Martins se opmerkings volg nadat die minister van landbou, visserye, water en grondhervorming, Inge Zaamwani, Dinsdag gesê het die regering beraadslaag met internasionale handelsvennote oor ’n besending vleis ter waarde van N$400 miljoen wat na Europa onderweg is. Zaamwani het in die parlement gesê sy het met Namibië se ambassadeur in Brasilië gepraat en sou later die week met die EU-ambassadeur vergader.“Ons is in gesprek met die betrokke handelsvennote,” het sy gesê.Volgens die minister sal Namibië ook die Wêreldorganisasie vir Dieregesondheid (WOAH) amptelik in kennis moet stel, waarna die lot van die besending van Namibië se naspeurbaarheidstelsel en die vereistes van invoerlande sal afhang.“Daar is ’n moontlikheid dat dit toegelaat kan word om voort te gaan, maar dit hang van ander lande se jurisdiksie en vereistes af,” het sy gesê. Die verstandhouding is dat aangeleenthede rakende dieregesondheid op EU-vlak hanteer word. Die verantwoordelike liggaam is die EU se direktoraat-generaal vir gesondheid en voedselveiligheid (DG SANTE). DG SANTE evalueer die uitbreking van bek-en-klouseer en die inligting wat deur die Namibiese veeartsenykundige owerhede verskaf is en is verantwoordelik vir die voorbereiding van die EU se maatreëls vir dieregesondheid. UITVOER VAN BEESVLEISNamibië het in November volgens data van die Lewende Hawe en Lewendehaweprodukteraad van Namibië (LLPBN) 1 474 078 kg beesvleis uitgevoer – ’n toename van 28,3% vergeleke met die 1 149 174 kg wat gedurende dieselfde maand in 2024 aangeteken is. Die EU was verantwoordelik vir die grootste deel van Namibië se beesvleisuitvoere en het 1 199 390 kg, ofte wel 81,4% van die totaal verteenwoordig. Griekeland het 103 092 kg (7%) ingevoer, terwyl Lesotho 99 993 kg (6,9%) ontvang het.Ten spyte van die toename in die uitvoer van beesvleis, het die aantal beeste wat in November vir die mark aangebied is, tot 14 846 kop gedaal. Dit verteenwoordig ’n afname van 31,2% vergeleke met die 21 564 wat in November 2024 aangeteken is.Van Januarie tot November verlede jaar is 189 243 beeste vir die mark aangebied – ’n afname van 47,1% vergeleke met die 371 982 wat gedurende die ooreenstemmende tydperk in 2024 aangeteken is. Die afname weerspieël voortdurende aanbodbeperkings wat beide die uitvoer van slagbeeste en lewende beeste beïnvloed. – nikanor@nmh-hub.com.na

BKS: EU gereed vir gesprek

Kommentaar

Republikein 2026-10-01

Meld asseblief aan om kommentaar te lewer

BKS: EU gereed vir gesprek

Kommentaar

Republikein 2026-10-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.