Bek-en-klouseer: 17 bevestigde gevalle by Karasburg

Sewentien van 199 dieremonsters wat tydens verskerpte toesig vir bek-en-klouseer (BKS) in Namibië ingesamel is, het positief getoets. Al die positiewe gevalle is tot dusver beperk tot die Karasburg-staatsveeartsenydistrik in die ǁKharasstreek.

Die waarnemende minister van landbou, Charles Mubita, het Saterdag tydens ’n mediakonferensie by die Staatshuis gesê dat naspeurbaarheid, kliniese ondersoeke en verdere toetse onderweg is om die omvang van die uitbreking vas te stel.

Die jongste uitslae volg op die bevestiging van BKS op 23 September nadat 10 van 11 monsters wat van ’n trop van 65 beeste op ’n kommersiële plaas in die Karasburg-distrik geneem is, positief getoets het.

Mubita het gesê amptenare het tussen 22 en 25 September tydens roetine-toesig oor verskeie streke nog 199 monsters ingesamel.

Hiervan is 117 monsters in Karasburg ingesamel, 50 in Gobabis, 30 in Otjiwarongo, een in Windhoek en een in Ondangwa. Al 17 positiewe uitslae het uit die Karasburg-staatsveeartsenydistrik gekom.

Die 65 beeste op die geraakte plaas, asook diere op omliggende plase, bly onder streng monitering.

Vier beeste toets negatief

Tydens opvolgondersoeke wat ná die aanvanklike positiewe uitslae gedoen is, is  vier beeste geïdentifiseer wat van die geraakte plaas in Karasburg na die Otjozondjupastreek verskuif is. Die vier diere was onder 30 beeste wat op 24 September getoets is. Die oorblywende 26 diere is uit voorsorg getoets en was nie aan die geraakte plaas gekoppel nie.

Al 30 monsters het negatief vir BKS getoets.

Mubita het gesê die ministerie van landbou, visserye, water en grondhervorming het veeartseny-amptenare van oraloor die land gemobiliseer, insluitend praktisyns uit die private en openbare sektor, om toesig te verskerp, dierbewegings na te spoor en monsters te versamel.

Die doel is om die omvang van die infektering so vinnig moontlik vas te stel en te bepaal wanneer en waar die huidige beperkings geleidelik verslap kan word.

Die minister het gesê ’n aankondiging sal gemaak word sodra voldoende uitslae beskikbaar is.

Beperkings bly van krag

Die regering het Namibië se BKS-noodplan geaktiveer nadat die siekte bevestig is en landswye beperkings ingestel op die beweging van gespletehoefdiere en hul rou produkte.

BKS word ingevolge die Dieregesondheidswet van 2011 as ’n aanmeldbare en staatsbeheerde siekte geklassifiseer.

Mubita het gesê die beperkings was nodig om owerhede tyd te gee om die verspreiding van die siekte te beoordeel en maatreëls te tref om dit in te perk.

Die ontleding van naspeurbaarheidsdata van die geraakte plaas en omliggende gebiede is nog onvoltooid, het hy gesê, aangesien die 14-dae-inkubasietydperk nog nie verstreke is nie.

Terwyl toesig voortduur, sal die regering dit oorweeg om sommige beperkings in spesifieke gebiede op te hef deur middel van ’n openbare veeartseny-kennisgewing en in ooreenstemming met die dieregesondheidswet.

Ekonomiese impak

Mubita het gewaarsku dat BKS ernstige ekonomiese gevolge kan hê deur die bemarking van vee en die breër landbouwaardeketting te ontwrig.

Die siekte kan huishoudelike inkomste, voedselsekerheid en landelike bestaansmiddele raak, terwyl langdurige beperkings ook druk kan plaas op indiensneming en ondernemings wat van veeboerdery en -handel afhanklik is. “Hierdie siekte ken geen grense nie; dit diskrimineer nie, en dit kan enige vee raak waar dit ook al voorkom,” het Mubita gesê.

Die uitbreking is binne Namibië se internasionaal erkende BKS-vrye sone opgespoor, wat die potensiële impak op veehandeI en uitvoermarkte verhoog.

Ondersteuningsfonds van stapel gestuur

Die ministerie het, met ondersteuning van die veesektor, ’n BKS-ondersteuningsfonds ingestel om te help om maatreëls te finansier om die uitbreking in te perk en te bestuur.

Mubita het ’n beroep gedoen op lede van die publiek, die private en openbare sektore en ontwikkelingsvennote om tot die fonds by te dra.

Bydraes kan gerig word deur:

• FNB Namibië: Windhoek Corporate Centre; Tak-kode: 281872; Rekening: 64290199172

• Bank Windhoek: Kudu-tak; Tak-kode: 482172; Rekening: 8052561959

Vir inligting oor bydraes het die ministerie kontakbesonderhede vir dr Ingrid Henckert-Weissnar verskaf op +264 81 127 6161.

Mubita het Namibiërs aangespoor om ten volle met veeartseny-owerhede saam te werk terwyl toesig- en naspeurbaarheidswerk voortgaan. Hy het gesê die regering sal voortgaan om opdaterings te verskaf soos nuwe inligting beskikbaar word.