‘BeeLeave’ in jou groen vingers

Die feit dat Susan Vermaak op ’n afgeleë plaas noordoos van Grootfontein woon, keer haar nie om ’n kranige – en boonop kreatiewe – sakevrou te wees nie. Buiten dat haar onderneming wat sementprodukte vir tuine maak, in Maart vanjaar sy vyfde bestaansjaar gevier het, het die Vermaaks op 1 Maart ook amptelik die deure van BeeLeave Kweekhuis geopen. “BeeLeave Kweekhuis is ons nuwe besigheid,” vertel Vermaak, wat in die Maroelaboom-omgewing woon. Susan sê dit was ’n spanpoging om die naam BeeLeave te kies. “My dogter, Suané Schoonbee, het die naam uitgedink. Die ‘by’ en ‘blaar’ is gepas vir die kweekhuis, maar beteken ook jy moet ‘glo in wat jy doen’. ”Die kweekhuis se plante kom alles uit haar tuin en skakel goed in met hul sementprodukte. Sy sê dit is nie net mense met “groen vingers” wat kan tuinmaak nie.“Nee jong, ek glo elkeen wat lief is vir plante, het groen vingers. Die plante uit my tuin is vir almal wat nie groen vingers het nie. Hulle is maklike én geharde plante. “Plante is soos kinders – as jy dit genoeg kos, water, aandag en liefde gee, dan floreer hulle,” sê sy. EERLIKE BESIGHEID“Ons glo daaraan om eerlik besigheid te doen en aan goeie menseverhoudings. Vriendelike en vinnige dienslewering dra ook tot &#039;n positiewe hupstoot vir enige besigheid by,” sê Susan. Sy sê Namibiërs verkies mooi en geharde plante wat in alle klimaatstoestande kan oorleef – in uiterste hitte asook in erge koue.“Mense bestel deur WhatsApp by ons en ons lewer op Grootfontein en met tye ook op Tsumeb af. Ons koerier die plante landswyd. Alles wat ek op my Facebook-blaaie of op sommige WhatsApp-groepe adverteer, is te koop. Die sementprodukte versprei ons direk of deur ons verspreiders.”“My plante is in hierdie staduim vir my &#039;n heerlike vars uitdaging – iets anders. Ek geniet dit om vroegoggend tussen ‘al die mooi buite’ besig te wees. “Ek glo die Here voorsien in al my gawes en talente. Sonder Hom is ek tot niks in staat nie.”SEMENTPRODUKTESusan sê die sementprodukte, wat aanvanklik as ’n stokperdjie begin het, het nou só vlamgevat dat sy al verskeie verspreidingspunte oraloor die land gevestig het.Sy het aanvanklik sowat sewe jaar gelede met die maak van sementprodukte vir tuine begin – tóé as ’n stokperdjie om geskenke vir vriende en familie te maak. “Ek het op klein skaal &#039;n stokperdjie gehad en later, hoe meer ek met die dinge besig was, het ek ’n passie daarvoor ontwikkel om mooi en kreatiewe produkte te maak. Ek geniet dit om mooi goed te maak waarvan mense hou. “Ná heelwat navrae oor die produkte, het ek besluit om &#039;n ekstra inkomste daaruit te verdien. My liefde vir die tuin en plantjies het ek verseker by my ma, Lenie Smit, geërf,” vertel sy. In Maart vanjaar het sy reeds vyf jaar lank sementprodukte vir tuine gemaak. “Ons verkoop &#039;n wye verskeidenheid sementprodukte vir die tuin en ook &#039;n paar produkte vir die huis,” vertel Susan. “My man, Jeremie, ondersteun my in alles,” vertel sy. Sy sê hulle het aanvanklik die sementprodukte self probeer versprei. “Ons het oral uitgestal en later besluit om eerder &#039;n paar verspreiders te kry. Dit werk wonderlik” Susan sê hulle het intussen al van hul produkte aan die groot kwekerye in Windhoek, Swakopmund, Okahandja en Hentiesbaai gelewer. “In hierdie stadium versprei ons die produkte self, asook by ons vier verspreiders op Grootfontein, Tsumeb, Otjiwarongo en Gobabis.”BeeLeave Kweekhuis is nog nuut en die Vermaak-egpaar versprei die plante self. Haar boodskap aan mense wat van iets nuuts ná die pandemie moet begin? “Moet nooit moed verloor nie. Leef jou drome uit en pak elke projek voluit en met liefde aan. Bly glo en vertrou, met die Here se hulp is niks onmoontlik nie.” – elvira@republikein.com.na

‘BeeLeave’ in jou groen vingers

Kommentaar

Republikein 2025-12-16

Meld asseblief aan om kommentaar te lewer

‘BeeLeave’ in jou groen vingers

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.