Agri-Xtra ‘n hoogtepunt vir landboukalender

‘n Bees- en bokskou, perdevertoning asook verskeie relevante landbou-inligtingsessies sal tydens die komende Agri-Xtra Konvensie vanaf 21 tot 23 April op Grootfontein se skougronde aangebied word.Mnr. Dawie Oosthuizen, voorsitter van die beeskomitee, wat onder die dorp se skouvereniging werk, het verduidelik die doel van die geleentheid is nie om die skou te vervang of afbreek daaraan te maak nie – dit is slegs aanvullend daartoe.“Die inisiatief kom van ons telerslede binne die beeskomitee. Daar bestaan lank reeds ‘n behoefte aan ‘n bykomende geleentheid buiten die skou waartydens telers hul beeste kan bemark.”Hy sê hulle het besluit dat dit juis nou ‘n goeie geleentheid sal wees om weer aan die gang te kom ná die Covid-inperkings, waartydens daar vir twee jaar lank geen skou gehou is nie. Hy meen dit sal help om “op te bou” tot die amptelike Grootfontein Skou wat vanaf 21 tot 23 September vanjaar sal plaasvind.Oosthuizen het verduidelik die geleentheid sal verskil van die skou, in die sin dat dit ook vir niehaltermak diere sal wees. “Die geregistreerde vee wat ingeskryf word, hoef nie haltermak te wees nie.”“Hopelik sal ons ‘n paar telers wat tot dusver nog nie aan skoue begin deelneem het nie, ‘honger maak’, want hulle gaan nou teen ‘n redelike lae koste ‘n niehaltermak dier vir beoordeling kan inskryf.“Die gemeenskap is honger vir die aktiwiteit. Deesdae is elke tweede verskoning Covid. Ons wil dit egter nie meer as ‘n verskoning gebruik nie, maar as motivering om die swaar tye te los waar dit hoort – in die verlede. Ons wil landbou – die hartklop van Grootfontein – weer aan die gang kry,” het hy gesê.Op die program is daar ook tuinbou-inligtingsessies deur Pupkewitz se tuinbou-ghoeroe Eugene le Roux, terwyl mnr. Helmke von Bach oor vertikale belegging op plase sal kom gesels. Mnr. Mecki Schneider sal die jongste verwikkelinge in die beeswaardeketting-forum (BVCF) bespreek en mnr. Georg Hellinghauzen die “laekoste aanwending van hommeltuie op plase”. Mnre. Piet Gouws, president van die Namibië Landbou-unie (NLU) asook Roelie Venter, die NLU se uitvoerende hoof, sal landbouers op Donderdag 21 April toespreek. Daarbenewens kry mnr. Thinus Pretorius, voorsitter van die Lewendehawe Produsentevereniging (LPO) ook Donderdag ‘n spreekbeurt, terwyl die voorsitter van die Akkerbou Produsentevereniging (APV), oor die jongste akkerbounuus sal gesels.Die Grootfontein Boerevereniging se voorsitter, mnr. Johan Enslin, spreek boere Saterdag toe, terwyl Bank Windhoek se mnr. Poen Brink daarna oor boedelbeplanning sal uitbrei. Die geleentheid word met ‘n dans en orkes op Saterdagaand vanaf 19:00 afgesluit.

Agri-Xtra ‘n hoogtepunt vir landboukalender

Kommentaar

Republikein 2026-02-03

Meld asseblief aan om kommentaar te lewer

Agri-Xtra ‘n hoogtepunt vir landboukalender

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.