Abbatoir staan leeg

Die Swakop-abattoir, die enigste op die kusdorp, het sedert 23 September, die dag waarop die uitbreking van bek-en-klouseer (BKS) in Namibië aangekondig is, nog geen diere geslag nie.Drie weke later is daar geen karkasse oor nie, is 25 van die 60 werknemers met verlof en sal die vragmotors ook nie uitgaan vir aflewerings nie.“Ons hang in die lug. Ons weet nie,” het die eienaar, Bernhard Frankenfeld, aan Erongo gesê.Volgens Frankenfeld het die abattoir beplan om die week ná die uitbreking te slag, maar is hulle aangesê om te wag.Om steeds aan hul gereelde kliënte te kan lewer, is 54 beeskarkasse by Meatco vir N$1,6 miljoen, oftewel N$108 per kilogram, aangekoop. ’n Week voor die uitbreking het die abattoir op ’n veiling ongeveer N$96 000 vir 54 beeste betaal. Die gewone prys is tussen N$68 en N$70 per kilogram.“Dit was ’n baie groot risiko wat ons geneem het,” het Frankenfeld gesê.Die prys van kruisbiefstuk (rump steak) het van N$160 tot N$170 per kilogram na tussen N$280 en N$340 per kilogram gestyg. Volgens Frankenfeld het kliënte gestry oor hoeveel karkasse elkeen sou kry.“Dit wys net hoe paniekerig mense oor vleis geraak het,” het hy gesê.Frankenfeld het Namibiërs versoek om nie diegene te blameer wat pryse verhoog het nie.“Mense moenie kla oor prysstygings nie, veral nie op Facebook nie,” het hy gesê. “’n Besigheid moet wins maak, nie verliese nie.”Werknemers wat nog verlofdae gehad het, is vir ’n maand met verlof gestuur.“Jy probeer die situasie aan hulle verduidelik, maar ek dink nie hulle besef werklik hoe ernstig dit is nie. Daar is geen inkomste nie,” het Frankenfeld gesê.Hy het bygevoeg dat die besigheid “’n paar miljoen per week” verloor, terwyl hulle steeds hul krediteure moet betaal.“As hierdie toestand vir twee of drie maande voortduur, is dit neusie verby met jou,” vrees hy. Die vervoerder in Windhoek wat die abattoir se diere aanry, het sewe vragmotors wat stilstaan.“Of jy nou groot of klein is – hoe groter jy is, hoe meer verloor jy,” het Frankenfeld gesê.Volgens hom moet die siekte onder beheer gebring word en is dit noodsaaklik dat ’n besluit gemaak moet word oor wanneer slagwerksaamhede hervat kan word.“Hulle moet ook voet by stuk hou en besluit wat gaan gebeur en wanneer dit gaan gebeur. Hulle kan nie ’n maand neem net om ’n besluit te neem nie,” het hy gemaan. Frankenfeld het gesê hy is nie ’n veearts nie, maar is van mening dat die Suide onder kwarantyn geplaas moes word, terwyl die res van die land toegelaat moes word om soos normaal voort te gaan.“Hulle bring die hele land tot stilstand.”Die abattoir is deur die munisipaliteit gebou, wat varke daar geslag het. Dit het 15 jaar lank gesluit gestaan voordat Frankenfeld – wat by ’n ander abattoir gewerk het – dit in 2011 ná drie maande se opknappings heropen het. “Jy weet mos hoe lyk ’n plek as dit 15 jaar lank gesluit was,” het hy gesê.nse wou weet hoe hy beeste en skape in die binneland sou koop, na die kus sou vervoer en hier sou verkoop. “Los my maar net. Ek sal dit regkry,” was sy antwoord. Die abattoir slag beeste, skape, bokke en varke, maar nie wild nie. Dit vervaardig Russiese en Weense worsies, polonie, biltong en droëwors. Die produkte word aan slaghuise, supermarkte en die Primo-vleiswinkel op die perseel verskaf, sowel as aan agente wat voorrade aan passasierskepe en vissersbote lewer.Frankenfeld het vertel van ’n bees wat sowat ses jaar gelede uit die abattoir ontsnap het. Dit het deur die verkeer gehardloop, oor die heining van ’n skool in Vineta gespring net toe die kinders na binne hardloop en in ’n agterplaas beland, waar dit geskiet is. ’n Vurkhyser het die dier oor ’n betonmuur getel terwyl sowat 200 motors stilgehou en toegekyk het.“Ons was te vinnig vir die koerant,” het Frankenfeld gespot.Hy het gesê selfs sy mededingers kan hom nie vertel wat aangaan nie. “As iemand my vra, sê ek: Vra my nie meer nie. Gaan net op Facebook en kyk wat jy wil doen.” – adam@erongo.com.na

Abbatoir staan leeg

Kommentaar

Republikein 2026-10-20

Meld asseblief aan om kommentaar te lewer

Abbatoir staan leeg

Kommentaar

Republikein 2026-10-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.