Windhoek jol in liefdesnaam

Vegkop-stadion in Windhoek is Saterdag op horings geneem met die derde Liefde by die Nam-musiekfees, waar Namibiërs die room van Afrikaanse musiek en selfs die verskuilde musiektalent van komediant en seremoniemeester vir die dag, Schalk Bezuidenhout, lewendig kon beleef.

Bezuidenhout het op die bekfluitjie die verhoog met verskeie van die grootste name in Afrikaanse musiek gedeel en het selfs sy stem verleen aan Die Heuwels Fantasties se treffer \'Pille vir Kersfees\'.

Die musiekfees het geopen met verskeie plaaslike musikante, onder meer Lin-Mari, Vaughn Ahrens en Sagarias Tsam. Die Voëlvry-legende Koos Kombuis het ook die skare vermaak met sy grootste treffers. Aan die einde van die aand het die kletsrymers Early B en Jack Parow die fees afgesluit.

– [email protected]