Wat maak vir Outjo lekker?
Die Outjo Wildsfees het gesorg vir vet pret die afgelope naweek.
Namibiërs het die afgelope naweek by die duisende na Outjo gestroom vir die immergewilde Outjo Wildsfees. Op die vermaakfront het top-kunstenaars uit Namibië en Suid-Afrika soos onder meer Appel, Eloff, Prime Circle en Shadowkatz feesgangers op hul voete en die dansvloer gehad. Die fees het gesorg dat daar iets vir van die kleinspan tot ma en pa was en wat van ‘n Koekedoortjie-kompetisie, spesiale geleenthede vir mans- en dames asook die wildveiling deur Du Preez Wild ingesluit het.
"Dit was lekker om weer terug te kom [na Namibië]," sê Prime Circle se Gavin Edwards. Hy het tydens die groep se vertoning aan die gehoor onthul dat Prime Circle byna ontbind het, maar dat die mense wat hul musiek luister die groep weer rigting gegee het.
"Solank julle luister, sal ons aanhou musiek maak," het Edwards aan die skare gesê.
Die Outjo Wildsfees was ook ’n tuiskoms vir die aktrise Je-ani Swiegelaar, wat tydens die Baarde & Vellies skaapkopete vir die manne vertel het sy is gebore en getoë op Tsumeb. Swiegelaar, wat die rol van Naomi vertolk in die bekende sepie Binnelanders, het haar mede-Binnelanders-ster, Melinda Viljoen (Tracy), na die fees vergesel.
Die Wildsfees het ook sy braaikampioene gekroon en wel die boesemvriende Henk Schrader en Danie Holtzhausen. "Ons is soos kettie en klip, groot pelle al die jare," vertel Danie. Dié twee het die kompetisie gewen met ’n wildsteak gevul met camembertkaas, sampioene en spek met ’n bosbessiesous en uiemarmelade. Die syfers van die aantal kaartjies wat tydens die fees verkoop is, was teen druktyd nog nie bekend nie, maar organiseerder Paul Oosthuizen was Vrydagoggend optimisties oor die verkope en het geskat tussen 5 000 en 6 000 mense is by die hekke verwag. – [email protected]
"Dit was lekker om weer terug te kom [na Namibië]," sê Prime Circle se Gavin Edwards. Hy het tydens die groep se vertoning aan die gehoor onthul dat Prime Circle byna ontbind het, maar dat die mense wat hul musiek luister die groep weer rigting gegee het.
"Solank julle luister, sal ons aanhou musiek maak," het Edwards aan die skare gesê.
Die Outjo Wildsfees was ook ’n tuiskoms vir die aktrise Je-ani Swiegelaar, wat tydens die Baarde & Vellies skaapkopete vir die manne vertel het sy is gebore en getoë op Tsumeb. Swiegelaar, wat die rol van Naomi vertolk in die bekende sepie Binnelanders, het haar mede-Binnelanders-ster, Melinda Viljoen (Tracy), na die fees vergesel.
Die Wildsfees het ook sy braaikampioene gekroon en wel die boesemvriende Henk Schrader en Danie Holtzhausen. "Ons is soos kettie en klip, groot pelle al die jare," vertel Danie. Dié twee het die kompetisie gewen met ’n wildsteak gevul met camembertkaas, sampioene en spek met ’n bosbessiesous en uiemarmelade. Die syfers van die aantal kaartjies wat tydens die fees verkoop is, was teen druktyd nog nie bekend nie, maar organiseerder Paul Oosthuizen was Vrydagoggend optimisties oor die verkope en het geskat tussen 5 000 en 6 000 mense is by die hekke verwag. – [email protected]
Kommentaar
Republikein
Geen kommentaar is op hierdie artikel gelaat nie