Waar Afrika se stories leef

Dit slaan jou asem weg. Vandat jy dit buite die eerste keer gewaar totdat jy binne, kop agteroor, boontoe kyk en haar rondings en draaie en verskuilde hoeke gewaar en dan weer terug vloer toe staar, waar lig uit die skaduwees wat dit gooi prentjies toor. Die museum vir kontemporêre kuns Afrika (Mocca) oftewel Zeitz Mocca, tower bo toeriste en bote by die Victoria Alfred Waterfront in Kaapstad uit. Die uiters fotogeniese museum is buiten vir die kuns, ook die asemrowende argitektuur en teksture enige fotograaf se droom. Na ’n besoek is jy maar diep dankbaar die dae van rolletjies film en donkerkamers is verby, want jy vang jouself gereeld dat jy eers jou selfoon se kamera moet laat sak om dit wat voor jou, bo jou en om jou is in te asem en te ervaar sonder om weer ’n foto te wil neem. Zeitz Mocca is vernoem na die entrepreneur Jochen Zeitz, wat sy uitgebreide persoonlike versameling van 21ste eeuse Afrika-kuns vir die museum se stigtersversameling geskenk het. Die oorspronklike struktuur is in 1921 gebou as 'n graansilo-kompleks wat 57 meter die lug in toring. Die kompleks is herontwerp deur Heatherwick Studio wat in London gebaseer is met Thomas Heatherwick aan die stuur. Danksy Heatherwick Studio het die historiese graansilos ’n gedaanteverwisseling ondergaan deur die uitkerf van ’n massiewe, katedraalagtige atrium uit die 42 betonbuise. Die atrium se beeldhoukundige vorm, geïnspireer deur 'n enkele mieliepit, rys op deur die hart van die gebou. Lig stroom deur buise van 5,5 meter breed en verbind industriële erfenis met moderne ontwerp.Die gebou bring hulde aan die mense wat dit gevorm het – van die oorspronklike bouers tot die spanne wat dit herbedink het – en staan as 'n simbool van Kaapstad se ontwikkelende verhaal: 'n bedrywige hawe wat in 'n kreatiewe baken omskep is.Zeit Mocca het as ’n openbare, nie-winsgewende museum haar deure vir die eerste keer op 22 September 2017 geopen as die grootste museum van kontemporêre kuns uit Afrika en van sy diaspora. Hier word uitgestal, versamel, bewaar en navorsing gedoen, met die lewende storie van Afrika wat vertel word deur skilderye, beeldhouwerk, fotografie, installasies en optredes. Tydens ’n besoek was die multi-generasie uitstalling ‘A Protea is Not a Flower’ op die verskeie vlakke te sien, met werke van die kontemporêre Suid-Afrikaanse kunstenaars Lerato Shadi en Robin Rhode in dialoog met die lewe en werke van die skilder Gerard Sekoto, en die skrywers Bessie Head en Don Mattera. Dit is deur Mattera se gedig, Protea, geïnspireer wat bannelingskap, veerkragtigheid en identiteit deur visuele kuns en literatuur ondersoek. Dit sluit van skilderye, installasies, fotografie, rolprente tot muurskilderye in, met die kunstenaars wat reflekteer oor oorlewing, om te behoort en ook kreatiwiteit oor verskillende geografieë en geskiedenisse.– henriette@republikein.com.na

Waar Afrika se stories leef

Kommentaar

Republikein 2026-10-15

Meld asseblief aan om kommentaar te lewer

Waar Afrika se stories leef

Kommentaar

Republikein 2026-10-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.